തൃശൂര്‍: നഗരത്തിലെ സ്വരാജ് റൗണ്ടില്‍ കുറുപ്പം റോഡിനും മാരാര്‍ റോഡിനും ഇടയിലുള്ള കെട്ടിടം പൊളിച്ചുനീക്കാന്‍ (demolished) തുടങ്ങി. കഴിഞ്ഞ ദിവസത്തെ ശക്തമായ മഴയില്‍ റൗണ്ടിലെ നടപ്പാതയോടു ചേര്‍ന്നുള്ള ഈ കെട്ടിടത്തിന്റെ ഭാഗം ഇടിഞ്ഞുവീണിരുന്നു. പൊളിക്കാനുള്ള 271 കെട്ടിടങ്ങളുടെ പട്ടികയില്‍ കോര്‍പറേഷന്‍ ഉള്‍പ്പെടുത്തിയ കെട്ടിടമാണിത്.
പട്ടികയിലുള്ള നാലു കെട്ടിടങ്ങള്‍ കഴിഞ്ഞ കാലവര്‍ഷത്തില്‍ തകര്‍ന്നിരുന്നു. ഇതേപോലുള്ള സംഭവം ആവര്‍ത്തിക്കാതിരിക്കാനും ജനങ്ങളുടെ സുരക്ഷ കണക്കിലെടുത്തുമാണ് ബുധനാഴ്ച രാത്രി തന്നെ കെട്ടിടം പൊളിച്ചുനീക്കാന്‍ കോര്‍പറേഷന്‍ തീരുമാനിച്ചത്.
പൊലീസ് സുരക്ഷയില്‍ മണ്ണുമാന്തിയന്ത്രം ഉപയോഗിച്ചാണ് കെട്ടിടം പൂര്‍ണമായും പൊളിക്കുന്നത്.കെട്ടിടത്തിലുള്ള അഞ്ചു കടമുറികളില്‍ മൂന്നെണ്ണമാണു പ്രവര്‍ത്തിച്ചിരുന്നത്. ഈ കടമുറികളില്‍ ഒന്നിന്റെ മുകള്‍ഭാഗമാണ് കഴിഞ്ഞ ദിവസം രാത്രി തകര്‍ന്നുവീണത്. മേല്‍ക്കൂരയും ചുമരും തകര്‍ന്നുവീഴുകയായിരുന്നു. ഇതോടെ സുരക്ഷയ്ക്കായി നടപ്പാത അടക്കം കോര്‍പറേഷന്‍ അടച്ചുകെട്ടിയിരുന്നു. മേയര്‍ എം കെ വര്‍ഗീസ്, ജില്ലാ ദുരന്തനിവാരണ അതോറിറ്റി ഉദ്യോഗസ്ഥര്‍ എന്നിവര്‍ സ്ഥലത്തെത്തി നടപടികള്‍ക്ക് നേതൃത്വം നല്‍കി.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
