തിരുവനന്തപുരം: വയനാട്ടില്‍ നിര്‍മ്മിക്കുന്ന തുരങ്കപാത കൊണ്ട് 22 കിലോമീറ്റര്‍ മാത്രമാണ് ദൂരം ലാഭിക്കാനാകുന്നതെന്ന് പരിസ്ഥിതി പ്രവര്‍ത്തകന്‍ ശ്രീധര്‍ രാധാകൃഷ്ണന്‍. ഇതിനായി 2500 കോടി രൂപയാണ് ചെലവഴിക്കുന്നത്. ടണലിന്റെ അലൈന്‍മെന്റ് നോക്കിയാല്‍ ഒരു ചുരവും ഒഴിവാക്കുന്നില്ല. കോഴിക്കോട്ടേക്ക് 22 കിലോമീറ്റര്‍ ദൂരം മാത്രമേ ലാഭിക്കാനാകുന്നുള്ളൂവെന്ന് അദ്ദേഹം ചൂണ്ടിക്കാട്ടി. ദി ന്യൂ ഇന്ത്യന്‍ എക്‌സ്പ്രസിന്റെ എക്സ്പ്രസ് ഡയലോഗ്‌സില്‍ സംസാരിക്കുകയായിരുന്നു ശ്രീധര്‍ രാധാകൃഷ്ണന്‍.
പണം ചെലവഴിക്കുന്നത് പുനരധിവാസത്തിനും പ്രശ്‌നപരിഹാരത്തിനുമാകണം. സര്‍ക്കാര്‍ മുന്‍ഗണന നല്‍കേണ്ടത് ഇത്തരം കാര്യങ്ങള്‍ക്കാണ്. ഇപ്പോള്‍ നിര്‍മ്മിക്കുന്ന റോഡ് ജനങ്ങള്‍ക്കു വേണ്ടിയല്ല, ബോച്ചെയ്ക്കു വേണ്ടിയാണെന്ന് ശ്രീധര്‍ രാധാകൃഷ്ണന്‍ പറഞ്ഞു. വയനാട്ടില്‍ നിന്നും രോഗികളെ കോഴിക്കോട് മെഡിക്കല്‍ കോളജില്‍ പെട്ടെന്ന് എത്തിക്കാനാകും എന്നാണ് ടണല്‍ റോഡുമായി ബന്ധപ്പെട്ട് കാരണം പറയുന്നത്.
വാര്‍ത്തകള്‍ അപ്പപ്പോള്‍ ലഭിക്കാന്‍ സമകാലിക മലയാളം ആപ് ഡൗണ്‍ലോഡ് ചെയ്യുക ഏറ്റവും പുതിയ വാര്‍ത്തകള്‍
അതാണ് ഉദ്ദേശമെങ്കില്‍ റോഡിന് പകരം വയനാട്ടില്‍ ആശുപത്രികള്‍ പണിയുകയല്ലേ വേണ്ടത്?. ഞാനായിരുന്നു മുഖ്യമന്ത്രിയെങ്കില്‍ ഈ പണം കൊണ്ട് വയനാട്ടില്‍ നാലു സൂപ്പര്‍ സ്‌പെഷ്യാലിറ്റി ആശുപത്രികള്‍ നിര്‍മ്മിക്കുമായിരുന്നെന്നും ശ്രീധര്‍ രാധാകൃഷ്ണന്‍ പറഞ്ഞു. അല്ലാതെ എല്ലാ രോഗികളെയും കോഴിക്കോട്ടേക്ക് എത്തിക്കുകയല്ല. ഇത് ചില മാഫിയകളുടെ കളിയാണ്. ശ്രീധര്‍ രാധാകൃഷ്ണന്‍ ആരോപിച്ചു.
ഇത് എന്‍വയേണ്‍മെന്റല്‍ ഫണ്ടമെന്റലിസം അല്ലേയെന്ന ചോദ്യത്തിന് അദ്ദേഹത്തിന്റെ മറുപടി ഇപ്രകാരമായിരുന്നു. ഞാന്‍ ചോദ്യം ചെയ്യുന്നത് ഡവലപ്പ്‌മെന്റല്‍ ഫണ്ടമെന്റലിസത്തെയാണ്. എന്‍വയേണ്‍മെന്റല്‍ ഫണ്ടമെന്റലിസം ആരെയും കൊല്ലുന്നില്ല. ഡവലപ്പ്‌മെന്റല്‍ ഫണ്ടമെന്റലിസം ആളുകളെ കൊന്നൊടുക്കുകയാണ്. എവിടെ നോക്കിയാലും അതു കാണാനാകും. വികസനയാഥാസ്ഥിതിക വാദമാണ് മനുഷ്യനെ കൊന്നുകൊണ്ടിരിക്കുന്നത്. കാലാവസ്ഥാ വ്യതിയാനം തൊട്ട് എല്ലാം. പരിസ്ഥിതിവാദം ഒന്നുമല്ലെങ്കില്‍ മുന്‍കരുതലായെങ്കിലും നില്‍ക്കുന്നുണ്ട്. കുറച്ച് കാശുണ്ടാക്കുന്നത് കുറയും. ശ്രീധര്‍ രാധാകൃഷ്ണന്‍ പറഞ്ഞു.
പ്രകൃതിയെ ചൂഷണം ചെയ്യാതെ ലോകത്ത് ഒരു വികസനവും നടക്കില്ലെന്ന് കേരള സര്‍വകലാശാല ജിയോളജി പ്രൊഫസറും കേരള സംസ്ഥാന ലാന്‍ഡ്‌സ്ലൈഡ് അഡൈ്വസറി കമ്മിറ്റി അംഗവുമായ ഡോ. സജിന്‍കുമാര്‍ കെ എസ് പറഞ്ഞു. അത് കഴിയുന്നത്ര മിനിമൈസ് ചെയ്യുക എന്നത് ഘടകമാണ്. മനുഷ്യര്‍ക്ക് മികച്ച റോഡുകളും അടിസ്ഥാന സൗകര്യങ്ങളും വേണം. ആറുവരി പാതയെ എതിര്‍ക്കുന്നവരെല്ലാം ബംഗളൂരുവിലേക്ക് പോകാന്‍ തമിഴ്‌നാട്ടിലൂടെ പോകുമോയെന്ന് ഡോ. സജിന്‍കുമാര്‍ ചോദിച്ചു.
ആറുവരിപ്പാതയെക്കുറിച്ച് പറയുമ്പോള്‍, ഇപ്പോള്‍ ഉള്ള റോഡുകള്‍ കൂടുതല്‍ നല്ലനിലയിലാക്കി മാറ്റുകയാണ് വേണ്ടത്. അല്ലാതെ പിന്നീട് ആറുവരിപ്പാതയും മോശമായി കിടക്കുന്നതല്ലല്ലോ വേണ്ടത്. വാഹനബാഹുല്യം ചൂണ്ടിക്കാട്ടിയപ്പോള്‍, പൊതുഗതാഗത സംവിധാനം മെച്ചപ്പെടുത്താന്‍ ആളുകള്‍ക്ക് ബാധ്യതയുണ്ടെന്ന് ഡോ. കെ എസ് താര പറഞ്ഞു. ഓരോ ആളുകള്‍ക്കും വാഹനം എന്നത് പറ്റുമോ? പൊതുഗതാഗത സംവിധാനം മികച്ചതാക്കുകയാണ് വേണ്ടതെന്നും ഡോ. താര അഭിപ്രായപ്പെട്ടു.
റോഡുകള്‍ വേണ്ടെന്ന് ഞങ്ങള്‍ പറയുന്നില്ലെന്ന് ശ്രീധര്‍ രാധാകൃഷ്ണന്‍ പറഞ്ഞു. നല്ല റോഡുകള്‍ വേണം. കുറേക്കാലമായിട്ട് നല്ല റോഡുകളില്ല. എന്നാല്‍ ഇപ്പോള്‍ നമുക്കുള്ളത് കുഴികള്‍ കാരണം ആളുകള്‍ മരിക്കുന്ന കൊലപാതക പാതകളാണ്. അപകടം കൊണ്ട് മരിക്കുന്ന റോഡുകളല്ല, മരണക്കുഴികള്‍ നിറഞ്ഞ റോഡുകള്‍. ഇപ്പോള്‍ പോത്തന്‍ കോടു നിന്നും അങ്കമാലിയിലേക്ക് പുതിയ റോഡ് നിര്‍മ്മിക്കുന്നു. മലയോര ഹൈവേ, കൂടാതെ തീരദേശ ഹൈവേയും. വാഹനങ്ങള്‍ കൂടുന്നതിന് അനുസരിച്ച് വരുംകാലത്ത് അതു ചെയ്തുകൊണ്ടേയിരിക്കും. ഭാവിയില്‍ മനുഷ്യന്‍ താമസിക്കാന്‍ പറ്റാത്ത അത്രയും റോഡുകള്‍ നിര്‍മ്മിക്കേണ്ടി വരുമെന്നും ശ്രീധര്‍ രാധാകൃഷ്ണന്‍ പറഞ്ഞു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
