ഇടിത്തീയായി ​ഗ്യാസ് വില വർധന, യാത്രാ വിലക്കുമായി യുഎഇ, ​ഗുജറാത്ത് മുന്നോട്ട്; ഇന്നത്തെ 5 പ്രധാന വാർത്തകൾ

അഞ്ചു സംസ്ഥാനങ്ങളിലെ നിയമസഭ തെരഞ്ഞെടുപ്പ് കഴിഞ്ഞതിനു പിന്നാലെ വാണിജ്യ സിലിണ്ടറുകളുടെ വിലയില്‍ വന്‍ വര്‍ധന വരുത്തി എണ്ണക്കമ്പനികള്‍. പശ്ചിമേഷ്യയിൽ സംഘർഷത്തിന്റെ പശ്ചാത്തലത്തിൽ യുഎഇ മൂന്ന് രാജ്യങ്ങളിലേക്ക് യാത്രാവിലക്ക് ഏർപ്പെടുത്തി. സംസ്ഥാനത്ത് വേനല്‍മഴ ശക്തമാകുന്നു. ഇന്നത്തെ 5 പ്രധാന വാര്‍ത്തകള്‍ ( Top 5 News Today ) അറിയാം

അഞ്ചു സംസ്ഥാനങ്ങളിലെ നിയമസഭ തെരഞ്ഞെടുപ്പ് കഴിഞ്ഞതിനു പിന്നാലെ പാചകവാതക വിലയില്‍ വന്‍ വര്‍ധന വരുത്തി എണ്ണക്കമ്പനികള്‍. വാണിജ്യ സിലിണ്ടറുകളുടെ വിലയാണ് കൂട്ടിയത്. ഒറ്റയടിക്ക് ആയിരം രൂപയ്ക്ക് അടുത്താണ് വില വര്‍ധിപ്പിച്ചിരിക്കുന്നത്. ഗാര്‍ഹിക സിലിണ്ടര്‍ വിലയില്‍ മാറ്റമില്ല.

പശ്ചിമേഷ്യയിൽ സംഘർഷം വീണ്ടും രൂക്ഷമാകുന്നു. സംഘർഷത്തിന്റെ പശ്ചാത്തലത്തിൽ യുഎഇ മൂന്ന് രാജ്യങ്ങളിലേക്ക് യാത്രാവിലക്ക് ഏർപ്പെടുത്തി. ഇറാൻ, ലബനൻ, ഇറാഖ് എന്നീ രാജ്യങ്ങളിലേക്കുള്ള യാത്ര പാടില്ലെന്നാണ് യുഎഇ സർക്കാർ പൗരന്മാർക്ക് നിർദേശം നൽകിയത്.

സംസ്ഥാനത്ത് വേനല്‍മഴ ശക്തമാകുന്നു. ഇന്ന് നാലു ജില്ലകളില്‍ ശക്തമായ മഴ മുന്നറിയിപ്പുണ്ട്. കോട്ടയം, ഇടുക്കി, മലപ്പുറം, വയനാട് ജില്ലകളിലാണ് യെല്ലോ അലര്‍ട്ട് പുറപ്പെടുവിച്ചിട്ടുള്ളത്. നാളെ ഏഴു ജില്ലകളിലും യെല്ലോ അലര്‍ട്ടുണ്ട്.

അമേരിക്കയിലെ ബാങ്കിങ് സ്ഥാപനം ജെപി മോര്‍ഗനിലെ മുതിര്‍ന്ന ഉദ്യോഗസ്ഥയ്‌ക്കെതിരെ ലൈംഗികാതിക്രമ പരാതി. ജെ പി മോര്‍ഗന്‍ ചേസിലെ എക്‌സിക്യൂട്ടീവ് ഡയറക്ടറായ ലോര്‍ണ ഹജ്ദിനിക്കെതിരെയാണ് ജൂനിയറായ ഇന്ത്യന്‍ വംശജന്‍റെ പരാതി. ലഹരി മരുന്ന് നല്‍കി ലൈംഗികമായി ഉപദ്രവിച്ചുവെന്നും ലൈംഗിക ബന്ധത്തിന് നിരസിച്ചപ്പോള്‍ കരിയര്‍ നശിപ്പിക്കുമെന്ന് ഭീഷണിപ്പെടുത്തിയതായും പരാതിയില്‍ പറയുന്നു.

റോയല്‍ ചലഞ്ചേഴ്‌സ് ബാംഗ്ലൂരിനെ തകര്‍ത്ത് ഗുജറാത്ത് ടൈറ്റന്‍സ്. ആര്‍സിബി മുന്നോട്ട് വച്ച 156 റണ്‍സിന്റെ വിജയലക്ഷ്യം നാല് വിക്കറ്റ് ബാക്കി വച്ചാണ് ഗുജറാത്ത് മറി കടന്നത്. 18 പന്തില്‍ 43 റണ്‍സ് നേടി ക്യാപ്റ്റന്‍ ശുഭ്മന്‍ ഗില്‍ ആണ് ഗുജറാത്തിനെ മുന്നില്‍ നിന്ന് നയിച്ചത്. ജോസ് ബട്ട്‌ലര്‍ 19 പന്തില്‍ 39 റണ്‍സും നേടിയപ്പോള്‍ 27 റണ്‍സാണ് രാഹുല്‍ തെവാട്ടിയ നേടിയത്.