വീട്ടുകാരറിയാതെ കാമുകനൊപ്പം കടന്നു, 18‌കാരി സഞ്ചരിച്ച കാർ അപകടത്തിൽപ്പെട്ടു; നാല് പേർ ആശുപത്രിയിൽ 

തിരുവനന്തപുരം: വീട്ടുകാരറിയാതെ കാമുകനൊപ്പം കടന്ന യുവതി സഞ്ചരിച്ച കാർ അപകടത്തിൽപ്പെട്ടു. കോട്ടയം കാഞ്ഞിരപ്പള്ളി സ്വദേശിയായ 18 വയസുകാരിയും വിഴിഞ്ഞം സ്വദേശി ഷമീറും(24) സഞ്ചരിച്ചിരുന്ന കാറാണ് അപകടത്തിൽപ്പെട്ടത്. ഇവർക്കൊപ്പമുണ്ടായിരുന്ന ഷമീറിന്റെ ബന്ധുക്കളായ ഹക്കീം (24) സുബൈദ് (24) എന്നിവർക്കും അപകടത്തിൽ പരിക്കേറ്റു. 

ഓൺലൈനിലൂടെ പരിചയപ്പെട്ടാണ് ഷമീറും പെൺകുട്ടിയും അടുപ്പത്തിലായത്. പ്രണയത്തെക്കുറിച്ച് അറിഞ്ഞ രക്ഷിതാക്കൾ പെൺകുട്ടിക്ക് 18 വയസ് മാത്രമേ ആയിട്ടുള്ളു എന്നതിനാൽ രണ്ടുവർഷം കഴിഞ്ഞ് വിവാഹത്തേക്കുറിച്ച് ആലോചിക്കാമെന്നാണ് അറിയിച്ചത്. ഇതേതുടർന്നാണ് പെൺകുട്ടിയെ വീട്ടുകാരറിയാതെ യുവാവും ബന്ധുക്കളും വിളിച്ചിറക്കിയത്. അപകടശേഷം പെൺകുട്ടിയുടെ വീടുമായി പൊലീസ് ബന്ധപ്പെട്ടപ്പോളാണ് മകൾ വീട്ടിൽ ഇല്ലെന്ന് വീട്ടുകാർ അറിഞ്ഞത്.

വിഴിഞ്ഞത്തേക്ക് പോകുന്ന വഴി കോലിയക്കോട് പുലന്തറയിൽ വെച്ചാണ് അപകടം സംഭവിച്ചത്. ഇവർ സഞ്ചരിച്ചിരുന്ന കാർ റോഡിനോട് ചേർന്നുള്ള മതിലിലിടിക്കുകയായിരുന്നു. പരിക്കേറ്റ നാലുപേരെയും തിരുവനന്തപുരം മെഡിക്കൽ കോളജ് ആശുപത്രിയിൽ പ്രവേശിപ്പിച്ചിരിക്കുകയാണ്.