മഴ കനക്കുന്നു, തുലാവർഷം രണ്ടു ദിവസത്തിനകം; രാജസ്ഥാനിൽ അപകടത്തിൽ 20 മരണം; ഇന്നത്തെ 5 പ്രധാന വാർത്തകൾ

മഴ കനക്കുന്നു. ഇന്ന് സംസ്ഥാനത്തെ ആറു ജില്ലകളിൽ അതിശക്ത മഴ മുന്നറിയിപ്പുണ്ട്. രാജസ്ഥാനിൽ ഓടിക്കൊണ്ടിരുന്ന ബസിന് തീപിടിച്ച് 20 പേർ മരിച്ചു. ഇന്നത്തെ 5 പ്രധാന വാർത്തകൾ ( Top 5 News Today ) അറിയാം.

രാജസ്ഥാനില്‍ ഓടിക്കൊണ്ടിരുന്ന ബസിന് തീപിടിച്ചുണ്ടായ അപകടത്തില്‍ 20 പേര്‍ കൊല്ലപ്പെട്ടു. ജെയ്‌സാല്‍മീറില്‍ നിന്ന് ജോദ്ധ്പുരിലേക്ക് പോവുകയായിരുന്ന ബസാണ് അഗ്നിക്കിരയായത്.

സംസ്ഥാനത്ത് മഴ വീണ്ടും കനക്കുന്നു. മധ്യ- തെക്കന്‍ ജില്ലകളില്‍ പരക്കെ മഴയ്ക്ക് സാധ്യത. ഇടിമിന്നലും മണിക്കൂറില്‍ 40 കിലോമീറ്റര്‍ വരെ വേഗതയില്‍ ശക്തമായ കാറ്റിനും സാധ്യതയുണ്ട്. കേരളത്തിൽ തുലാവർഷം രണ്ടു ദിവസത്തിനകം എത്തിയേക്കുമെന്നാണ് പ്രവചനം.

ആറന്മുള അഷ്ടമിരോഹിണി വള്ളസദ്യയില്‍ ആചാര ലംഘനം നടന്നെന്ന വിവാദത്തില്‍ വിശദീകരണവുമായി സിപിഎം. ഭഗവാന് നേദിക്കുന്നതിന് മുമ്പ് മന്ത്രിക്ക് സദ്യവിളമ്പിയെന്ന് പ്രചരിപ്പിക്കുന്നത് തെറ്റാണ്. ഭക്തരെ തെറ്റിദ്ധരിപ്പിക്കാനാണ് ചിലരുടെ ശ്രമമെന്ന് സിപിഎം പത്തനംതിട്ട ജില്ലാ കമ്മിറ്റി വ്യക്തമാക്കി.

2026 ലെ ഫുട്‌ബോള്‍ ലോകകപ്പിന് ഖത്തറും. 2022ല്‍ ആതിഥേയരായി ലോകകപ്പില്‍ കളിച്ച ഖത്തര്‍ ഇത്തവണ ഏഷ്യയില്‍ നിന്നും ഔദ്യോഗികമായി യോഗ്യത നേടിയാണ് ടൂര്‍ണമെന്റില്‍ എത്തുന്നത്. യുഎഇയെ 2-1 കീഴടക്കിയാണ് ഖത്തര്‍ ലോകകപ്പ് ബെര്‍ത്ത് ഉറപ്പിച്ചിരിക്കുന്നത്.

എഎഫ്‌സി ഏഷ്യന്‍ കപ്പ് ഫുട്‌ബോളില്‍ ഫൈനല്‍ റൗണ്ട് കാണാതെ ഇന്ത്യ പുറത്ത്. യോഗ്യതാ മത്സരത്തില്‍ സിംഗപ്പൂര്‍ ഇന്ത്യയെ തോല്‍പ്പിച്ചു. നിര്‍ണായക ഹോം മത്സരത്തില്‍ ലീഡ് നേടിയശേഷമായിരുന്നു ഇന്ത്യയുടെ തോല്‍വി.