കൊച്ചി: കാലടി സര്‍വകലാശാലയിലെ വിദ്യാര്‍ത്ഥികളുടെ സസ്‌പെന്‍ഷനില്‍ വിമര്‍ശനവുമായി ഹൈക്കോടതി. മൂന്നു മാസം വിദ്യാര്‍ത്ഥികളെ സസ്‌പെന്‍ഡ് ചെയ്തു. ഇനിയെന്ത് മാപ്പ്?. ഇനിയും അരിശം തീര്‍ന്നില്ലേയെന്നും ഹൈക്കോടതി സര്‍വകലാശാലയോട് ചോദിച്ചു. ഇത്ര കാലം അവരെ പുറത്ത് നിര്‍ത്തിയില്ലേ. ഇനിയെന്താണ് സര്‍വകലാശാലയ്ക്ക് വേണ്ടതെന്നും കോടതി ചോദിച്ചു. സസ്പെന്ഷന് കാരണമെന്താണെന്നും, ഈ വിഷയത്തില്‍ രണ്ട് എഫ്‌ഐആര്‍ എന്തിനെന്നും കോടതി ആരാഞ്ഞു.
കേസില്‍ വിശദമായ വാദം കേള്‍ക്കല്‍ വെള്ളിയാഴ്ച നടക്കും. സസ്‌പെന്‍ഷനെതിരെ വിദ്യാര്‍ത്ഥികള്‍ നല്‍കിയ ഹര്‍ജി പ്രാഥമികമായി പരിഗണിക്കുമ്പോഴായിരുന്നു കോടതിയുടെ വിമര്‍ശനം. ഇവരൊക്കെ കുട്ടികളല്ലേയെന്ന് ചോദിച്ച കോടതി, ഇപ്പോള്‍ മുതിര്‍ന്നവരായ രാഷ്ട്രീയക്കാര്‍ കുട്ടികളായിരിക്കെ എന്തൊക്കെ ചെയ്തിട്ടുണ്ടാകുമെന്നും ആരാഞ്ഞു. വിദ്യാര്‍ത്ഥികള്‍ ചെയ്തതിനെ എല്ലാത്തതിനെയും കോടതി ന്യായീകരിക്കുന്നില്ല. പക്ഷെ 60 ദിവസത്തിലേറെയായി അവര്‍ പുറത്തു നില്‍ക്കുകയല്ലേയെന്ന് കോടതി ചോദിച്ചു.
ഇനിയെന്തിനാണ് മാപ്പ്, അച്ചടക്ക നടപടി കഴിഞ്ഞില്ലേയെന്ന് കോടതി ചോദിച്ചു. വൈസ് ചാന്‍സലറെ കയ്യേറ്റം ചെയ്തു, മറ്റ് പ്രതിഷേധങ്ങള്‍ നടത്തിയെന്നും സര്‍വകലാശാല ചൂണ്ടിക്കാട്ടി. വിദ്യാര്‍ത്ഥികള്‍ക്കെതിരെ ഒരു കേസെടുത്തു. രണ്ടു ദിവസം കഴിഞ്ഞ് മറ്റൊരു കേസു കൂടി രജിസ്റ്റര്‍ ചെയ്തു. ഇതെങ്ങനെ രണ്ടു കേസുകള്‍ നിലനില്‍ക്കുമെന്ന് ഹൈക്കോടതി ചോദിച്ചു. രണ്ടു സംഭവത്തിലാണ് കേസെടുത്തതെന്നാണ് സര്‍വകലാശാല കോടതിയെ അറിയിച്ചത്. വിദ്യാര്‍ത്ഥികള്‍ക്കെതിരെ നടപടി നീട്ടിക്കൊണ്ടു പോകുന്നത് എന്തിനെന്ന് കോടതി ചോദിച്ചു.
16 വിദ്യാര്‍ത്ഥികള്‍ക്കെതിരായ സസ്പെന്ഷന് നടപടി പിന്‍വലിക്കുക, പരീക്ഷ എഴുതാന്‍ അനുവദിക്കുക തുടങ്ങിയ ആവശ്യങ്ങളാണ് ഹര്‍ജിയില്‍ മുന്നോട്ടുവെച്ചിട്ടുള്ളത്. നേരത്തെ നല്‍കിയ റിട്ട് ഹര്‍ജി ഭേദഗതി ചെയ്തുകൊണ്ടുള്ള പുതിയ ഹര്‍ജിയാണ് വിദ്യാര്‍ത്ഥികള്‍ സമര്‍പ്പിച്ചത്. പരീക്ഷ എഴുതാന്‍ തങ്ങള്‍ക്ക് അര്‍ഹതയുണ്ടെന്നും, 60 ശതമാനം ഹാജര്‍ ഉണ്ടെന്നും ഹര്‍ജിയില്‍ ചൂണ്ടിക്കാട്ടുന്നു. മാപ്പെഴുതി നൽകിയാൽ 12 വിദ്യാർത്ഥികളുടെ സസ്പെൻഷൻ പിൻവലിക്കാമെന്ന് സിൻഡിക്കേറ്റ് വ്യക്തമാക്കിയിരുന്നു. എന്നാൽ ഈ നിർദേശം വിദ്യാർത്ഥികൾ തള്ളിക്കളഞ്ഞിരുന്നു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
