കുടിയേറ്റക്കാര്‍ ഗ്വാണ്ടനാമോയിലേക്ക്; വിവാഹത്തലേന്ന് വരന് ദാരുണാന്ത്യം; ഇന്നത്തെ 5 പ്രധാന വാർത്തകൾ

ഇ പി ജയരാജന്റെ ആത്മകഥാ വിവാദത്തില്‍ പൊലീസ് അന്വേഷണം പൂര്‍ത്തിയാക്കി. കേസില്‍ ഉടന്‍ കുറ്റപത്രം സമര്‍പ്പിക്കും. കേസില്‍ ഡി സി ബുക്‌സ് പ്രസിദ്ധീകരണ വിഭാഗം മുന്‍ മേധാവി എവി ശ്രീകുമാറിനെ മാത്രമാണ് പ്രതി ചേര്‍ത്തിട്ടുള്ളത്.

അനധികൃത കുടിയേറ്റക്കാരെ ഗ്വാണ്ടനാമോ തടവറയില്‍ അടയ്ക്കാന്‍ നീക്കം. ഗ്വാണ്ടനാമോ തടവറ വിപുലീകരിക്കാന്‍ യുഎസ് പ്രസിഡന്റ് ഡോണള്‍ഡ് ട്രംപ് ഉത്തരവ് നല്‍കി. 30,000 ത്തോളം തടവറകള്‍ സജ്ജമാക്കാനാണ് ആഭ്യന്തര സുരക്ഷാ വകുപ്പിന് നിര്‍ദേശം നല്‍കിയത്.

വിവാഹ തലേന്ന് യുവാവ് വാഹനാപകടത്തിൽ മരിച്ചു. കോട്ടയം കടപ്ലാമറ്റം സ്വദേശി ജിജോ ജിൻസൺ ആണ് എം സി റോഡിലുണ്ടായ വാഹനാപകടത്തിൽ മരിച്ചത്. ഒപ്പമുണ്ടായിരുന്ന സുഹൃത്തിന് ഗുരുതര പരിക്കേറ്റു. ഇലക്കാട് പള്ളിയിൽ ഇന്ന് രാവിലെ ജിജോമോന്റെ വിവാഹം നടക്കാനിരിക്കെയാണ് ദാരുണ അന്ത്യം.

ചോറ്റാനിക്കരയില്‍ ആണ്‍സുഹൃത്തില്‍ നിന്നും ക്രൂരപീഡനത്തിന് ഇരയായ പെണ്‍കുട്ടിയുടെ നില അതീവ ഗുരുതരമായി തുടരുന്നു. ആൺസുഹൃത്തിൽ നിന്നും പെൺകുട്ടി ക്രൂര മർദ്ദനത്തിന് ഇരയായതായി പൊലീസ് പറഞ്ഞു. സുഹൃത്ത് അനൂപിനെ പൊലീസ് അറസ്റ്റ് ചെയ്തു

പ്രതിപക്ഷ നേതാവ് വിഡി സതീശന്‍ നയിക്കുന്ന മലയോര സമരയാത്രയില്‍ പിവി അന്‍വര്‍ പങ്കെടുക്കും. നിലമ്പൂര്‍ മണ്ഡലത്തിലെ എടക്കരയിൽ യാത്രയ്ക്ക് നൽകുന്ന സ്വീകരണത്തിലാണ് അൻവർ പങ്കെടുക്കുക. എൽഡിഎഫുമായി തെറ്റിപ്പിരിഞ്ഞ ശേഷം ഇതാദ്യമായാണ് യുഡിഎഫിന്റെ ഒരു പരിപാടിയില്‍ അന്‍വര്‍ പങ്കെടുക്കുന്നത്.

ദക്ഷിണ സുഡാനിൽ വിമാനം തകര്‍ന്ന് ഇന്ത്യക്കാരനടക്കം 20 പേര്‍ മരിച്ചു. രണ്ട് പൈലറ്റുമാര്‍ ഉള്‍പ്പെടെ 21 പേരാണ് വിമാനത്തിലുണ്ടായിരുന്നത്. ദക്ഷിണ സുഡാനിലെ ജുബയിലെ എണ്ണപ്പാടത്തുനിന്ന് പറന്നുയുര്‍ന്ന ചൈനീസ് എണ്ണക്കമ്പനിയുടെ ചാര്‍ട്ടേഡ് വിമാനമാണ് തകര്‍ന്നുവീണത്.