ആലപ്പുഴ: കായംകുളത്ത് വ്യാജ ഡിഗ്രി സര്‍ട്ടിഫിക്കറ്റ് കേസില്‍ പൊലീസ് കസ്റ്റഡിയില്‍ വിട്ട മുന്‍ എസ്എഫ്‌ഐ നേതാവ് നിഖില്‍ തോമസിനെ കായംകുളത്തെ വീട്ടിലെത്തിച്ച് തെളിവെടുത്തു. ഇന്ന് ഉച്ചയോടെയാണ് നിഖില്‍ തോമസിനെ കായംകുളത്തെ വീട്ടില്‍ തെളിവെടുപ്പിനായി എത്തിച്ചത്. വ്യാജ ഡിഗ്രി സര്‍ട്ടിഫിക്കറ്റുമായി ബന്ധപ്പെട്ട രേഖകള്‍ കണ്ടെത്തുകയായിരുന്നു ലക്ഷ്യം. നാളെയും തെളിവെടുപ്പ് തുടരും.
ഏഴു ദിവസത്തേക്കാണ് നിഖിലിനെ കസ്റ്റഡിയില്‍ വിട്ടിരിക്കുന്നത്. രണ്ടു ലക്ഷം രൂപ വാങ്ങി നിഖിലിന് സര്‍ട്ടിഫിക്കറ്റും മറ്റു രേഖകളും നല്‍കിയ മുന്‍ എസ്എഫ്‌ഐ നേതാവും കേസിലെ രണ്ടാം പ്രതിയുമായ അബിന്‍ സി രാജിനായി തിരച്ചില്‍ നോട്ടിസ് പുറപ്പെടുവിക്കും.കേസില്‍ രണ്ടാം പ്രതിയാണ് അബിന്‍ സി രാജ്. സുഹൃത്തു മുഖേന അബിനുമായി അന്വേഷണ ഉദ്യോഗസ്ഥര്‍ സംസാരിച്ചിരുന്നു. താന്‍ നല്‍കിയ സര്‍ട്ടിഫിക്കറ്റും രേഖകളും ഒറിജിനലാണെന്നാണ് ഇയാള്‍ പറയുന്നത്.
പൊലീസ് നിര്‍ദേശപ്രകാരം നാട്ടിലെത്തിയില്ലെങ്കില്‍ ഇയാള്‍ക്കായി വിമാനത്താവളങ്ങള്‍ കേന്ദ്രീകരിച്ച് തിരച്ചില്‍ നോട്ടിസും തുടര്‍ന്ന് റെഡ് കോര്‍ണര്‍ നോട്ടിസും പുറപ്പെടുവിക്കാനാണു തീരുമാനം. നിഖിലിനു സര്‍ട്ടിഫിക്കറ്റ് നല്‍കിയ എറണാകുളത്തെ എജന്‍സിയിലും കലിംഗ യൂണിവേഴ്‌സിറ്റിയിലും നിഖിലിനെ തെളിവെടുപ്പിനായി എത്തിക്കും. അതേസമയം, മൊബൈല്‍ ഫോണ്‍ വീടിനു സമീപമുള്ള തോട്ടില്‍ ഉപേക്ഷിച്ചു എന്നാണ് നിഖില്‍ പൊലീസിനോട് പറഞ്ഞത്. ഇത് പൊലീസ് വിശ്വാസത്തിലെടുത്തിട്ടില്ല. ഫോണ്‍ കണ്ടെത്താനുളള ശ്രമങ്ങളും പൊലീസ് നടത്തുന്നുണ്ട്.
ഈ വാര്‍ത്ത കൂടി വായിക്കൂ
സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
