തെരഞ്ഞെടുപ്പിന് മുന്പുള്ള അവസാന നിയമസഭാ സമ്മേളനത്തിന് ഇന്ന് തുടക്കം, ആദ്യം ഗവര്ണറുടെ നയപ്രഖ്യാപന പ്രസംഗം; ബജറ്റ് 29ന്
തിരുവനന്തപുരം: പതിനഞ്ചാം കേരള നിയമസഭയുടെ പതിനാറാം സമ്മേളനത്തിന് ഇന്ന് (ചൊവ്വാഴ്ച) തുടക്കമാകും. നിയമസഭ തെരഞ്ഞെടുപ്പിന് തൊട്ടുമുന്പുള്ള അവസാന സമ്മേളനം എന്ന നിലയില് വിവിധ വിഷയങ്ങളില് ഭരണപക്ഷവും പ്രതിപക്ഷവും സഭയില് കൊമ്പുകോര്ക്കും. തെരഞ്ഞെടുപ്പിന് മുന്പ് ഭരണപക്ഷത്തിനും പ്രതിപക്ഷത്തിനും ജനങ്ങള്ക്ക് മുന്നില് തങ്ങളുടെ നിലപാട് മുന്നോട്ടുവെയ്ക്കാനുള്ള വേദിയായി ഇത് മാറും. സര്ക്കാരിനുവേണ്ടി ഗവര്ണര് ഇന്ന് നയപ്രഖ്യാപന പ്രസംഗം നടത്തും.
രാവിലെ 8.45ന് മുഖ്യമന്ത്രി പിണറായി വിജയനും സ്പീക്കര് എ എന് ഷംസീറും ചേര്ന്ന് ഗവര്ണറെ സ്വീകരിക്കും. ആദ്യദിവസം നയപ്രഖ്യാപനപ്രസംഗം മാത്രമേ ഉണ്ടാകൂ. അന്തരിച്ച സഭാംഗം കാനത്തില് ജമീലയ്ക്ക് അന്ത്യോപചാരമര്പ്പിച്ച് ബുധനാഴ്ച പിരിയും.
22, 27, 28 തീയതികളില് നയപ്രഖ്യാപന പ്രസംഗത്തിനുള്ള നന്ദിപ്രമേയ ചര്ച്ചയാണ്. 29ന് ധനമന്ത്രി കെ എന് ബാലഗോപാല് സംസ്ഥാന ബജറ്റ് അവതരിപ്പിക്കും. ജീവനക്കാരുടെയും അധ്യാപകരുടെയും അഷ്വേര്ഡ് പെന്ഷന് സ്കീം ഉള്പ്പെടെ വിവിധ പദ്ധതികളുടെ പ്രഖ്യാപനം ബജറ്റിലുണ്ടാകും.
മാര്ച്ച് 26ന് സഭ പിരിയും. അതിനിടയില് തെരഞ്ഞെടുപ്പു പ്രഖ്യാപനമുണ്ടായാല് സമ്മേളനം വെട്ടിച്ചുരുക്കും. പാലക്കാട് എംഎല്എ രാഹുല് മാങ്കൂട്ടത്തിലിനെതിരെ സിപിഎമ്മിലെ ഡി കെ മുരളി നല്കിയ പരാതി സഭ പരിഗണിച്ച് പ്രിവിലേജ് ആന്ഡ് എത്തിക്സ് കമ്മിറ്റിക്ക് വിട്ടേക്കും. കഴിഞ്ഞ സമ്മേളന കാലത്ത് പീരുമേട് എംഎല്എ വാഴൂര് സോമന് അന്തരിച്ചിരുന്നു. പിന്നീട് കൊയിലാണ്ടി എംഎല്എ കാനത്തില് ജമീലയും അന്തരിച്ചു. ലൈംഗികാതിക്രമ കേസില് ജയിലിലായ പാലക്കാട് അംഗം രാഹുല് മാങ്കൂട്ടത്തിലും സഭയില് എത്തില്ല.
The last assembly session before the election begins today, Governor's policy speech first
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates

