അതിവേ​ഗ വൈറസ് കേരളത്തിൽ എത്തിയിട്ടില്ല; ആദ്യ പരിശോധനാ ഫലങ്ങളിൽ ആശ്വാസം

തിരുവനന്തപുരം: ജനിതക മാറ്റം വന്ന കൊറോണ വൈറസ് കേരളത്തിൽ എത്തിയിട്ടില്ല. പരിശോധനയ്ക്ക് അയച്ച ആദ്യ സാമ്പിളുകളുടെ ഫലം വന്നപ്പോഴാണ് കേരളത്തിന് ആശ്വാസമായുള്ള  റിപ്പോർട്ട്. പൂനെ വൈറളോജി ലാബിലേക്ക് അയച്ച ആറ് സാമ്പിളുകളുടെ ഫലമാണ് വന്നത്. പരിശോധനയിൽ പുതിയ തീവ്ര വൈറസ് സാമ്പിൾ പരിശോധനയിൽ കണ്ടെത്തിയില്ല. 

ബ്രിട്ടനിലടക്കം ജനിതക മാറ്റം വന്ന വൈറസിന്റെ വ്യാപനം ശ്രദ്ധയിൽപ്പെട്ടയുടനെ കേരളത്തിൽ ജാഗ്രത വർധിപ്പിച്ചിരുന്നു. ബ്രിട്ടനിൽ നിന്നെത്തി കോവിഡ് സ്ഥിരീകരിച്ച രോഗികളുടെ സാമ്പിൾ പരിശോധനയ്ക്കായി അയച്ചിരുന്നു. ഇതിൽ ആദ്യ ഘട്ടത്തിൽ അയച്ച സാമ്പിളുകളുടെ ഫലമാണ് ഇപ്പോൾ വന്നിരിക്കുന്നത്. 

പത്തനംതിട്ടയിൽ നിന്നയച്ച മൂന്ന് സാമ്പിളിന്റെയും എറണാകുളത്ത് നിന്നയച്ച രണ്ട് സാമ്പിളിന്റെയും കോഴിക്കോട് നിന്നയച്ച ഒരു സാമ്പിളിൻ്റെയു ഫലമാണ് വന്നിരിക്കുന്നത്. 26 പേരുടെ ഫലം ഇനിയും വരാനുണ്ട്.