സെയിൽസ് മാൻ മാറിയ തക്കത്തിന് രണ്ട് സ്വർണമാലകൾ ബാ​ഗിലാക്കി; മൂന്നു പവൻ കവർന്ന് യുവതി; പരാതി

മലപ്പുറം;സ്വർണക്കടയിൽ എത്തി മൂന്ന് പവന്റെ മാലകൾ കവർന്ന് യുവതി. മലപ്പുറം ചെമ്മാടാണ് സംഭവമുണ്ടായത്. സ്വർണം വാങ്ങാൻ എന്ന വ്യാജേന എത്തിയ യുവതി സെയിൽസ് മാൻ മാറിയ തക്കത്തിന് മാല കൈക്കലാക്കുകയായിരുന്നു. സംഭവത്തിൽ കടയുടമ പൊലീസിൽ പരാതി നൽകി. 

വ്യാഴാഴ്ച രാവിലെയാണ് സംഭവമുണ്ടായത്. നിരവധി മാലകളുടെ മോഡലുകൾ സെയിൽസ്മാൻ എടുത്തുകൊണ്ടുവരുന്നത് സിസിടിവി ദൃശ്യങ്ങളിൽ കാണാം. ഇത്തരത്തിൽ മാലകൾ എടുക്കാൻ സെയിൽസ്മാൻ മാറിയ തക്കത്തിന് രണ്ട് സ്വർണമാലകൾ കൈക്കലാക്കുകയായിരുന്നു. തുടർന്ന് കയ്യിൽ കരുതിയ ബാഗിലേക്ക് സ്വർണമാല മാറ്റി. ഇതിന്റെ സിസിടിവി ദൃശ്യങ്ങൾ പുറത്തുവന്നിട്ടുണ്ട്. 

മോഷണത്തിന് ശേഷം സ്വർണം വാങ്ങാതെ യുവതി ജ്വല്ലറിയിൽ നിന്നു മടങ്ങുകയായിരുന്നു. യുവതി പോയശേഷം നടത്തിയ പരിശോധനയിലാണ് ഒന്നരപ്പവന്റെ രണ്ടു സ്വർണമാലകൾ കാണാനില്ലെന്നു അറിയുന്നത്. ജ്വല്ലറിയിലെ സിസിടിവി ദൃശ്യങ്ങൾ പരിശോധിച്ചപ്പോഴാണ് യുവതിയാണു മാല മോഷ്ടിച്ചതെന്ന് വ്യക്തമായത്. ജ്വല്ലറി ഉടമകൾ തിരൂരങ്ങാടി പൊലീസിൽ പരാതി നല്‍കി.

ഈ വാര്‍ത്ത കൂടി വായിക്കൂ 

പേര് ചോദിച്ചറിഞ്ഞശേഷം തല്ലിച്ചതച്ചു, മം​ഗളൂരിൽ മലയാളി വിദ്യാർത്ഥികൾക്ക് നേരെ സദാചാര ആക്രമണം; ആശുപത്രിയിൽ​

സമകാലിക മലയാളം ഇപ്പോള്‍ വാട്‌സ്ആപ്പിലും ലഭ്യമാണ്. ഏറ്റവും പുതിയ വാര്‍ത്തകള്‍ക്കായി ക്ലിക്ക് ചെയ്യൂ