കന്നിയങ്കത്തിൽ ജയം, ഇനി ജീവിതത്തിലും ഒന്നിച്ച്; പ്രായം കുറഞ്ഞ പഞ്ചായത്ത് പ്രസിഡന്റ് വിവാഹിതയാകുന്നു, വരൻ ബ്ലോക്ക് പഞ്ചായത്തംഗം 

പത്തനംതിട്ട: സംസ്ഥാനത്തെ പ്രായം കുറഞ്ഞ പഞ്ചായത്ത് പ്രസിഡന്റ് രേഷ്മ മറിയം റോയ് വിവാഹിതയാകുന്നു. സ്വന്തം പഞ്ചായത്ത് ഉൾപ്പെടുന്ന ബ്ലോക്ക് ഡിവിഷനിലെ അംഗം വർഗീസ് ബേബി ആണ് വരൻ. ഒരേപാർട്ടിക്കാരാണ് ഇരുവരും. എന്നാൽ പ്രണയവിവാഹമല്ലെന്ന് രേഷ്മ പറഞ്ഞു.

അരുവാപ്പുലം പഞ്ചായത്ത് പ്രസിഡന്റാണ് രേഷ്മ. ബേബി കോന്നി ബ്ലോക്ക് പഞ്ചായത്തിലെ അരുവാപ്പുലം ഡിവിഷൻ അംഗവും. ഇരുവരും സംസാരിച്ചശേഷം വീട്ടുകാരോട് വിവരം പറയുകയായിരുന്നെന്ന് രേഷ്മ പറഞ്ഞു. ഇന്നലെയായിരുന്നു നിശ്ചയം. ഡിസംബർ 26-ന് വൈകീട്ട് നാലിന് പ്രമാടം രാജീവ് ഗാന്ധി ഇൻഡോർ സ്റ്റേഡിയത്തിലാണ് വിവാഹചടങ്ങുകൾ. 

സിപിഎം അരുവാപ്പുലം ലോക്കൽ കമ്മിറ്റിയംഗമാണ് രേഷ്മ. വർഗീസ് കോന്നി ഏരിയാ കമ്മിറ്റിയംഗവും. കഴിഞ്ഞ പഞ്ചായത്ത് തിരഞ്ഞെടുപ്പിലാണ് രണ്ടുപേരും കന്നിയങ്കം ജയിച്ചത്.