ഉടനടി വൈദ്യുതി നിയന്ത്രണം ആവശ്യമില്ലെന്ന് കെഎസ്ഇബി; മഴ കനക്കുമെന്ന് പ്രതീക്ഷ 

തിരുവനന്തപുരം: സംസ്ഥാനത്ത് ഉടനടി വൈദ്യുതി നിയന്ത്രണം ആവശ്യമില്ലെന്ന് കെഎസ്ഇബി. വരും ദിവസങ്ങളിൽ മഴ കനക്കുമെന്ന കാലാവസ്ഥാ റിപ്പോർട്ടുകളിൽ പ്രതീക്ഷവച്ചാണ് ലോഡ്ഷെഡിംഗ് ഉടൻ വേണ്ടെന്ന നടപടി സ്വീകരിച്ചത്. ഈ മാസം അവസാനം വരെ നിലവിലെ സ്ഥിതി തുടരാനാണ് തീരുമാനം. 

കേന്ദ്രവൈദ്യുതി നിലയങ്ങളില്‍ നിന്നും കേരളത്തിന് ലഭിക്കേണ്ട വൈദ്യുതിയില്‍ കുറവുണ്ടായത് മൂലം ചില സ്ഥലങ്ങളിൽ വൈദ്യുതി നിയന്ത്രണം നിലവിലുണ്ട്. അതേസമയം പൂർണമായി നിയന്ത്രണം ഏർപ്പെടുത്തുന്നതിൽ ഈ മാസം 30ന് ശേഷം തീരുമാനമെടുക്കാമെന്നാണ് ധാരണ.

മഴയുടെ അളവും അണക്കെട്ടിലെ ജലനിരപ്പും അടക്കമുള്ള വിവരങ്ങൾ വിലയിരുത്താനായി ഓഗസ്റ്റ് ഒന്നിന് വീണ്ടും യോഗം ചേരും. ഈ മാസം മുപ്പത് വരെ ജലവൈദ്യുതി പദ്ധതികളെ ആശ്രയിക്കാമെന്നാണ് കെഎസ്ഇബിയുടെ കണക്കൂട്ടൽ. അതിനുള്ളിൽ കാലവർഷം ശക്തിപ്പെടുമെന്നാണ് പ്രതീക്ഷ.