ഓടിയെത്തിയ പശുവിന്റെ കയറിൽ കുരുങ്ങി ; ഒന്നര വയസ്സുകാരിക്ക് ദാരുണാന്ത്യം

തിരുവനന്തപുരം : പശുവിന്റെ കയറിൽ കുരുങ്ങി പരിക്കേറ്റ പിഞ്ചുകുട്ടി മരിച്ചു. അയിര വെളിയങ്കോട്ടുകോണം മേക്കേതട്ട് വീട്ടിൽ രാജേഷ്-ഷൈനി ദമ്പതിമാരുടെ ഒന്നര വയസ്സുള്ള മകൾ സൈറയാണ് മരിച്ചത്. ഞായറാഴ്ച രാവിലെ വീടിനു സമീപത്തെ ബന്ധുവീട്ടിൽ കളിച്ചുകൊണ്ടിരിക്കേ ആയിരുന്നു അപകടം.

ഓടിയെത്തിയ പശുവിന്റെ കയറിൽ സൈറ കുരുങ്ങുകയായിരുന്നു. കയറിൽ കുരുങ്ങിയ കുഞ്ഞിനെയും കൊണ്ട്‌ പശു ഓടി. ഓട്ടത്തിൽ കുഞ്ഞിനു പരിക്കേറ്റു. ബന്ധുക്കളുടെ മുന്നിൽവച്ചായിരുന്നു സംഭവം.

പരിക്കേറ്റ കുഞ്ഞിനെ പാറശ്ശാല താലൂക്ക് ആശുപത്രിയിലും തുടർന്ന് തിരുവനന്തപുരം മെഡിക്കൽ കോളേജിലും എത്തിെച്ചങ്കിലും മരിച്ചു.  പശുവിന്റെ കയറിൽ കുരുങ്ങിയതിനെത്തുടർന്നുണ്ടായ പരിക്കാണ് മരണകാരണമെന്ന് ബന്ധുക്കൾ പൊഴിയൂർ പൊലീസിന് മൊഴി നൽകിയിട്ടുണ്ട്.