കോവിഡ് പ്രതിസന്ധി : മുഖ്യമന്ത്രി എംപിമാരുടെയും എംഎൽഎമാരുടെയും യോ​ഗം വിളിച്ചു

തിരുവനന്തപുരം : സംസ്ഥാനത്ത് കോവിഡ് പ്രതിസന്ധി ചർച്ച ചെയ്യാൻ മുഖ്യമന്ത്രി പിണറായി വിജയൻ ജനപ്രതിനിധികളുടെ യോ​ഗം വിളിച്ചു. എംപിമാരുടെയും എംഎൽഎമാരുടെയും യോ​ഗമാണ് വിളിച്ചത്. ചൊവ്വാഴ്ച രാവിലെ പത്തരയ്ക്ക് വീഡിയോ കോൺഫറൻസ് വഴിയാണ് യോ​ഗം നടക്കുക.

ലോക്ക്ഡൗണിൽ കൂടുതൽ ഇളവുകൾ വരുന്ന സാഹചര്യം കൂടി കണക്കിലെടുത്ത് തുടർന്ന് എന്തൊക്കെ നടപടികൽ സ്വീകരിക്കണം എന്നതടക്കം യോ​ഗം ചർച്ച ചെയ്യും. കേന്ദ്രത്തിൽ നിന്ന് അടക്കം എന്തൊക്കെ നടപടികൾ സ്വീകരിക്കാമെന്ന് എംപിമാരോടും, ഓരോ പ്രദേശത്തിന്റെയും സ്വഭാവം അനുസരിച്ച് പ്രാദേശികമായി എന്താണ് കൂടുതലായി ചെയ്യേണ്ടത് എന്ന് എംഎൽഎമാരോടും ചർച്ച ചെയ്യുമെന്നാണ് മുഖ്യമന്ത്രിയുടെ ഓഫീസ് വിശദീകരിക്കുന്നത്. 

ഓരോദിവസവും കോവിഡ് രോ​ഗികളുടെ എണ്ണം വർധിക്കുകയാണ്. പ്രവാസികളും മറ്റു സംസ്ഥാനങ്ങളിൽ നിന്നും വരുന്നവരും വർധിച്ചതോടെയാണ് രോ​ഗബാധിതരുടെ എണ്ണവും കൂടിയത്. ഇന്നലെ മാത്രം 42 പുതിയ കേസുകളാണ് സ്ഥിരീകരിച്ചത്. ഇനിയും കോവിഡ് കേസുകളുടെ എണ്ണം വർധിക്കുമെന്നാണ് ആരോ​ഗ്യവകുപ്പിന്റെ കണക്കുകൂട്ടൽ.