കോവിഡ് ബാധിച്ച് ദുബായിൽ മലയാളി മരിച്ചു

ദുബായ് : കോവിഡ് ബാധിച്ച് ദുബായിൽ മലയാളി മരിച്ചു. തൃശൂർ ചേറ്റുവ സ്വദേസി ഷംസുദ്ദീനാണ് മരിച്ചത്. 65 വയസ്സായിരുന്നു. ദുബായ് പൊലീസിൽ മെക്കാനിക്കൽ വിഭാ​ഗം ജീവനക്കാരനായിരുന്നു.

സൗദിയിൽ ആറു വിദേശികളടക്കം ഏഴു പേരാണ് ഇന്നലെ  കോവിഡ് ബാധിച്ചു മരിച്ചത്. ഇതോടെ രാജ്യത്തെ മരണസംഖ്യ 121 ആയി. 1158 പേർക്കുകൂടി രോഗം സ്ഥിരീകരിച്ചതോടെ ആകെ രോഗബാധിതരുടെ എണ്ണം 13930 ആയി.

യുഎഇയിൽ നാലു വിദേശികളാണ് കോവിഡ് ബാധിച്ചു മരിച്ചത്. ഇതോടെ മരണസംഖ്യ 56 ആയി. 518 പേർക്കാണ് പുതുതായി രോഗം സ്ഥിരീകരിച്ചത്. 8756 ആകെ രോഗബാധിതർ. കുവൈത്തിൽ 61 ഇന്ത്യക്കാരുൾപ്പെടെ 151 പേർക്കുകൂടി രോഗം സ്ഥിരീകരിച്ചു. ഇതോടെ കുവൈത്തിൽ രോഗബാധിതരായ ഇന്ത്യക്കാരുടെ എണ്ണം 1310 ആയി.

ഖത്തറിൽ 623 പേർക്കുകൂടി രോഗം സ്ഥിരീകരിച്ചതോടെ ആകെ രോഗബാധിതരുടെ എണ്ണം 7764 ആയി. ബഹ്റൈനിൽ 1082 പേർ സുഖം പ്രാപിച്ചു. 1008 പേരാണ് ഇനി ചികിൽസയിലുള്ളത്. ഒമാനിൽ 1716 പേരാണ് രോഗബാധിതർ. 307 പേർ സുഖം പ്രാപിച്ചു.