ചാലക്കുടി: താലൂക്ക് സര്‍വേയറുടെ സ്‌കെച്ച് ഇല്ലാതെയാണ് ദിലീപിന്റെ ഡി സിനിമാസിന്റെ നിര്‍മാണത്തിന് അനുമതി നല്‍കിയതെന്ന ആരോപണം ചര്‍ച്ച ചെയ്യാന്‍ ചാലക്കുടി നഗരസഭയുടെ പ്രത്യേക കൗണ്‍സില്‍ ഇന്ന് ചേരും. ഡി സിനിമാസിന്റെ നിര്‍മാണത്തിന് അനുമതികള്‍ നല്‍കിയതുമായി ബന്ധപ്പെട്ടാണ് കൗണ്‍സില്‍ ചര്‍ച്ച ചെയ്യുക.
ചട്ടങ്ങള്‍ ലംഘിച്ച് ഡി സിനിമാസിന് നിര്‍മാണ അനുമതി കൊടുത്തതിന് എതിരെ ചാലക്കുടി നഗരസഭയില്‍ തമ്മിലടി രൂക്ഷമാണ്. ഇടതുമുന്നണി ഭരിക്കുന്ന നഗരസഭയില്‍ പരസ്പരം പഴിചാരി ഇതിന്റെ ഉത്തരവാദിത്വം പരസ്പരം തലയില്‍ കെട്ടിവയ്ക്കാനാണ് ഇവിടെ ശ്രമം നടക്കുന്നത്.
ഡി സിനിമാസിന്റെ നിര്‍മാണത്തിന് അനുമതി നല്‍കിയത് യുഡിഎഫ് നഗരസഭ ഭരിക്കുന്ന കാലത്താണെന്നാണ് എല്‍ഡിഎഫിന്റെ വാദം. എന്നാല്‍ ചട്ടങ്ങള്‍ ലംഘിച്ചാണ് ഡി സിനിമാസ് നിര്‍മിച്ചിരിക്കുന്നതെങ്കില്‍ പൊളിച്ചുമാറ്റാത്തത് എന്താണെന്ന ചോദ്യമാണ് യുഡിഎഫ് ഉന്നയിക്കുന്നത്.
ഡി സിനിമാസിന്റെ നിര്‍മാണത്തിനായി ഭൂമി കയ്യേറിയിട്ടില്ലെന്ന് കഴിഞ്ഞ ദിവസം സര്‍വേ വിഭാഗം വ്യക്തമാക്കിയിരുന്നു. എഴ് തവണയെങ്കിലും കൈമാറ്റം നടന്നാണ് ഭൂമി ദിലീപിന്റെ കയ്യിലേക്ക് എത്തിയതെന്ന് അധികൃതര്‍ പറയുന്നു. എന്നാലിത് മിച്ചഭൂമി അല്ലെന്നാണ് നിഗമനം. ഏത് തരം ഭൂമിയാണ് ഇതെന്ന് ഭൂമിയുടെ രേഖകളില്‍ രേഖപ്പെടുത്തിയിട്ടില്ലെന്നും ആരോപണമുണ്ട്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
