പാചകവാതകസിലിണ്ടറില്‍ നിന്ന് പൊള്ളലേറ്റ് ഹോട്ടല്‍ ജീവനക്കാരിക്ക് ദാരുണാന്ത്യം

ആലപ്പുഴ: പാചകവാതക സിലിണ്ടറില്‍ നിന്ന് തീപടര്‍ന്ന് പൊള്ളലേറ്റ ഹോട്ടല്‍ ജീവനക്കാരി മരിച്ചു. ചെങ്ങന്നൂരിലെ തിരുവല്ല ഓതറ സ്വദേശിനി ഇന്ദിരയാണ് മരിച്ചത്. രാവിലെ എട്ടുമണിയോടെ ചെങ്ങന്നൂര്‍ ബഥേല്‍ ജങ്ഷഷനിലാണ് സംഭവം. ഇവരെ ആലപ്പുഴ വണ്ടാനം മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ച് ചികിത്സ നല്‍കി വരികയായിരുന്നു.   

പുതിയ പാചക വാതക സിലിണ്ടറിന്റെ അടപ്പ് മാറ്റിയപ്പോള്‍ വാതക ചോര്‍ച്ച ഉണ്ടാവുകയും തൊട്ടടുത്തുണ്ടായിരുന്ന അടുപ്പില്‍ നിന്ന് തീ പടരുകയുമായിരുന്നു. ഉടന്‍ ഫയര്‍ഫോഴ്‌സിനെ വിവരമറിയിച്ചെങ്കിലും ഇടുങ്ങിയ റോഡിലൂടെ എത്തിച്ചേരുന്നതിന് താമസം നേരിട്ടു. തീയണച്ചശേഷം ഇന്ദിരയെ ആദ്യം ചെങ്ങന്നൂര്‍ താലൂക്ക് ആശുപത്രിയില്‍ എത്തിച്ചു. പരിക്ക് ഗുരുതരമായതിനാല്‍ തുടര്‍ന്ന് വണ്ടാനത്തേക്ക് മാറ്റുകയായിരുന്നു.