മദ്യപിച്ച് വരുന്നവരെ പള്ളിയില്‍ കയറ്റില്ലെന്ന് പറയാന്‍ സഭയ്ക്ക് ധൈര്യമുണ്ടോ ? ;  വെല്ലുവിളി സിപിഎം ഏറ്റെടുക്കുന്നു : ആനത്തലവട്ടം 

തിരുവനന്തപുരം : സര്‍ക്കാരിന്റെ മദ്യനയത്തില്‍ ചെങ്ങന്നൂരില്‍ കാണാമെന്ന ക്രിസ്ത്യന്‍ സഭകളുടെ വെല്ലുവിളി ഏറ്റെടുക്കുന്നുവെന്ന് സിപിഎം. സിപിഎം സംസ്ഥാന സെക്രട്ടേറിയറ്റ് അംഗം ആനത്തലവട്ടം ആനന്ദനാണ് ഇക്കാര്യം വ്യക്തമാക്കിയത്. മദ്യപിച്ച് വരുന്നവരെ പള്ളിയില്‍ കയറ്റില്ലെന്ന് പറയാന്‍ സഭയ്ക്ക് ധൈര്യമുണ്ടോയെന്നും ആനത്തലവട്ടം ആനന്ദന്‍ ചോദിച്ചു. ഇടതുപക്ഷത്തിന്റെ മദ്യനയം ചെങ്ങന്നൂര്‍ ഉപതെരഞ്ഞെടുപ്പില്‍ പ്രതിഫലിക്കുമെന്ന സഭയുടെ വെല്ലുവിളി പാര്‍ട്ടി ഏറ്റെടുക്കുന്നുവെന്നും അദ്ദേഹം വ്യക്തമാക്കി. 

മദ്യശാലകള്‍ തുറക്കുന്നതിന്റെ പേരില്‍ ജനങ്ങളെ തെറ്റിദ്ധരിപ്പിക്കാന്‍ ശ്രമം നടക്കുന്നതായി എക്‌സൈസ് മന്ത്രി ടിപി രാമകൃഷ്ണന്‍ പ്രതികരിച്ചു. സഭയുടെ ഉത്കണ്ഠ കാര്യങ്ങള്‍ മനസ്സിലാക്കാതെയാണ്. ചെങ്ങന്നൂരിലെ ജനങ്ങള്‍ക്ക് കാര്യം മനസ്സിലാകുമെന്നും മന്ത്രി ടിപി രാമകൃഷ്ണന്‍ പ്രതികരിച്ചു. 

സംസ്ഥാനത്ത് പുതിയ ബാറുകള്‍ അനുവദിക്കില്ലെന്ന് മന്ത്രി രാവിലെ വ്യക്തമാക്കിയിരുന്നു. അടച്ചുപൂട്ടിയവ മാത്രമാണ് തുറക്കുന്നത്. സുപ്രീംകോടതി വിധിയുടെ അടിസ്ഥാനത്തില്‍ നിയമാനുസൃതമായി മാത്രമേ മദ്യശാലകള്‍ തുറക്കൂവെന്ന് മന്ത്രി വ്യക്തമാക്കിയിരുന്നു.