ഇന്ത്യ ഇറാനില്‍ നിന്ന് എണ്ണ വാങ്ങുന്നത് നിര്‍ത്തണം; ഉപരോധം ശക്തമാക്കാന്‍ പുതിയ നിര്‍ദ്ദേശവുമായി യുഎസ്‌

വാഷിംഗ്ടണ്‍:  ഇറാനില്‍ നിന്നും എണ്ണ ഇറക്കുമതി ചെയ്യുന്നത് ഇന്ത്യ അവസാനിപ്പിക്കണമെന്ന് യുഎസ് ആവശ്യപ്പെട്ടു. എണ്ണ ഇറക്കുമതി ഇപ്പോള്‍ മുതല്‍ കുറച്ചു കൊണ്ട് വന്ന് നവംബര്‍ നാലിനോടെ പൂര്‍ണമായും നിര്‍ത്തലാക്കണമെന്നാണ് ട്രംപ് സര്‍ക്കാര്‍ ആവശ്യപ്പെട്ടിരിക്കുന്നത്.

ഇറാനുമേല്‍ ഏര്‍പ്പെടുത്തിയ ഉപരോധം വ്യാപിപ്പിക്കുന്നതിന്റെ ഭാഗമായാണ് ഈ ആവശ്യം. അടുത്തയാഴ്ച യുഎസില്‍ വച്ച് നടക്കാനിരിക്കുന്ന 'ടു പ്ലസ് ടു ' ചര്‍ച്ചയില്‍ ഇക്കാര്യം പ്രധാന അജണ്ടയാകുമെന്നാണ് പ്രതീക്ഷിക്കുന്നത്. വിദേശകാര്യമന്ത്രി സുഷമാ സ്വരാജും, പ്രതിരോധമന്ത്രി നിര്‍മ്മലാ സീതാരാമനുമാണ് ഉഭയകക്ഷി ചര്‍ച്ചകള്‍ക്കായി യുഎസ്സിലെത്തുന്നത്. സെക്രട്ടറി ഓഫ് സ്റ്റേറ്റ് മൈക്ക് പോംപിയോയുമായും പ്രതിരോധ സെക്രട്ടറി ജെയിംസ് മാറ്റിസുമായാണ് ഇരുവരുടെയും കൂടിക്കാഴ്ച.

ഇറാന് ഉപരോധം ഏര്‍പ്പെടുത്തുന്നത് സംബന്ധിച്ച വിഷയം ചൈനയോടും ആവശ്യപ്പെട്ടതായി റിപ്പോര്‍ട്ടുകളുണ്ട്. ഇന്ത്യയും ഇന്ത്യന്‍ കമ്പനികളും ഇറക്കുമതി അവസാനിപ്പിക്കണമെന്ന് എല്ലാ ഉഭയകക്ഷി ചര്‍ച്ചകളിലും ആവശ്യപ്പെടുന്നതാണെന്നും യുഎസ് വ്യക്തമാക്കി.യൂറോപ്യന്‍ യൂണിയന്‍ രാജ്യങ്ങളോടും ഇക്കാര്യം ആവശ്യപ്പെടുമെന്നും ഉന്നത ഉദ്യോഗസ്ഥന്‍ വെളിപ്പെടുത്തി. തീരുമാനങ്ങളില്‍ സഖ്യരാജ്യങ്ങളും സഹകരിക്കണമെന്നാണ് അമേരിക്ക പ്രതീക്ഷിക്കുന്നതെന്നും അദ്ദേഹം കൂട്ടിച്ചേര്‍ത്തു.

എന്നാല്‍ ഇറാനുമായി മികച്ച വ്യാപാരബന്ധം തുടരുന്ന ഇന്ത്യ ഇക്കാര്യത്തില്‍ ഐക്യരാഷ്ട്രസഭയുടെ നിലപാട് അനുസരിച്ച് മാത്രമേ പ്രവര്‍ത്തിക്കൂ എന്ന തീരുമാനത്തിലാണ്.2011-15 കാലഘട്ടത്തില്‍ എണ്ണ ഇറക്കുമതി ഇന്ത്യ കുറച്ചിരുന്നുവെങ്കിലും 2016 ഓടെ ഇറാനുമായുണ്ടായിരുന്ന ബന്ധം പുനഃസ്ഥാപിച്ചിരുന്നു.ഇന്ത്യയും ചൈനയുമാണ് ഇറാനില്‍ നിന്നും ഏറ്റവുമധികം എണ്ണ ഇറക്കുമതി ചെയ്യുന്ന രാജ്യങ്ങള്‍.