പെണ്ണും പൊന്നും - ഒരു ദ്വിമാന സമവാക്യം; അമൃത കേളകം എഴുതിയ കവിത

മീനത്തിലെ പുലരിയില്‍

മാനത്തെ അമ്പിളിക്ക് താലികെട്ട്

കാതില്‍ താരകപ്പൊട്ടുകമ്മല്‍

കഴുത്തിലെ മിന്നല്‍ക്കണ്ണിമാല

കൈയ്യില്‍ മൂവന്തിക്കൈവള

പൊന്‍വെയില്‍ കസവിട്ട പാരിജാതപ്പട്ട്.

പവന്‍കണക്കെ പൊന്ന് വേണ്ടെന്ന്

തളിരമ്പിളി തറപ്പിച്ചു

വെളിച്ചത്തിന്റെ ഈറ്റില്ലങ്ങളില്‍

കിനാവിളക്കത്തവള്‍

കൊത്തങ്കല്ലാടി !

മഴനൂലിട്ട് നെയ്ത പന്തലില്‍

പഞ്ചാരമണല്‍പ്പായയില്‍

കല്ല്യാണച്ചിന്ത് പാടി

പുതുപ്പെണ്ണ് കൈകൊട്ടിക്കളിച്ചു.

പൊന്നിന്റെ പെരുപെരുക്കത്തില്‍,

പണത്തിന്റെ ഞെരുഞെരുക്കത്തില്‍

ആര്‍പ്പുവിളിച്ച കല്യാണവീടുകള്‍

അമ്പിളിപ്പെണ്ണിനോടസൂയപ്പെട്ടു !

മംഗലരാവടുത്തപ്പോള്‍

മധുരപ്പുഞ്ചിരിയുമായി

സ്വര്‍ണക്കടക്കാരവിടെ തമ്പടിച്ചു

പൊന്ന് വേണ്ടെന്ന ചൊല്ലിനെ

പണിക്കൂലി കുറച്ച്, മാറ്റ് കൂട്ടിയവര്‍

ഹോള്‍സെയ്‌ലാക്കി.

അരയടി വീതിയില്‍

ആന്റീക്ക് ഷോമാല

ലേറ്റസ്റ്റ് ഫാഷനില്‍

ലൈറ്റ് വെയ്റ്റ് കളക്ഷന്‍

ആകര്‍ഷകമായ എക്‌സ്‌ചേഞ്ച് ഓഫര്‍

പെണ്ണ് പൊന്നിട്ടേ തീരൂയെന്ന്

മാറി മാറി വന്നവര്‍ ശഠിച്ചു.

പണിക്കൂലിയില്ലാത്തവര്‍

സുപ്രഭാതംപാടി പടിക്കല്‍ പല്ലിളിച്ചു

പണിക്കുറവില്ലാത്തവര്‍

ലഞ്ച് കോംബോ ഓഫറാല്‍

ഉച്ചയുറക്കം കെടുത്തി

എക്‌സ്‌ക്ലൂസീവ് ഡിസൈനര്‍ ജ്വല്ലേഴ്‌സ്

സീ വ്യൂ സ്യൂട്ടില്‍

ഹണിമൂണ്‍ ടിക്കറ്റ് ലോക്ക് ചെയ്തു.

അന്തംവിട്ട അമ്പിളിപ്പെണ്ണ്

ആശയങ്ങളുടെ അരത്തുണ്ട് വെളിച്ചത്തില്‍

ഏച്ചുകെട്ടിയ പട്ടങ്ങള്‍

'അഭിമാന'പ്പുറത്ത് ആയത്തില്‍പ്പറത്തി

അരപ്പവനുരുക്കിയെടുത്ത്

അതുവഴി വന്ന കാറ്റ്

ആരുംകാണാതെയവള്‍ക്ക്

ആലിലത്താലി ചാര്‍ത്തി !