പ്രകോപനത്തിന് താക്കീത്; ഖലീൽ അഹമ്മദിന് പണികിട്ടി

മുംബൈ: വെസ്റ്റ് ഇൻഡീസിനെതിരായ നാലാം ഏകദിന പോരിൽ ഇന്ത്യയെ വിജയത്തിലേക്ക് നയിക്കുന്നതിൽ ഖലീൽ അഹമ്മദിന്റെ മികവും നിർണായകമായിരുന്നു. അഞ്ചോവറിൽ 13 റൺസ് മാത്രം വഴങ്ങി മൂന്ന് വിക്കറ്റുകൾ വീഴ്ത്തിയാണ് ഖലീൽ മികവ് പുലർത്തിയത്. 

വിന്‍ഡീസ് ബാറ്റിങ് നിരയിലെ നിര്‍ണായകമായ മൂന്ന് വിക്കറ്റ് നേടി മികച്ച് നിന്നെങ്കിലും മുംബൈ ഏകദിനത്തില്‍ ഇപ്പോൾ പണികിട്ടിയിരിക്കുകയാണ് ഖലീൽ അഹമ്മദിന്. മത്സരത്തിനിടെ പ്രകോപനപരമായ ആം​ഗ്യം കാണിച്ചതിന് എെസിസി താരത്തിന് താക്കീത് നൽകി. മത്സരത്തിനിടെ മർലോൺ സാമുവല്‍സിനെ പുറത്താക്കിയ ശേഷമായിരുന്നു താരം പ്രകോപനപരമായ ആംഗ്യം കാണിച്ചത്. ഔദ്യോഗികമായ താക്കീതും ഒരു ഡീമെറിറ്റ് പോയിന്റുമാണ് താരത്തിന് ശിക്ഷയായി വിധിച്ചത്. 

നാലാം ഏകദിനത്തിനിടെയാണ് സംഭവം. 224 റണ്‍സ് വിജയം നേടിയ ഇന്ത്യയ്ക്കായി അഞ്ച് ഓവറില്‍ നിന്ന് 13 റണ്‍സ് മാത്രം വിട്ടു നല്‍കി ഖലീല്‍ മൂന്ന് വിക്കറ്റ് നേടിയിരുന്നു. മത്സരത്തിന്റെ 14ാം ഓവറിലാണ് സംഭവം. രോഹിത് ശര്‍മ്മ പിടിച്ച് മര്‍ലോൺ സാമുവല്‍സ് സ്ലിപ്പില്‍ പുറത്തായപ്പോഴാണ് ഖലീൽ പ്രകോപനപരമായ ആം​ഗ്യം കാണിച്ചത്.