ടി20 ലോകകപ്പ് പോരിന് 20 രാജ്യങ്ങൾ; ടീമുകളുടെ എണ്ണം കൂട്ടാൻ ഐസിസി നീക്കം

ന്യൂഡൽഹി: ടി20 ലോകകപ്പിൽ ടീമുകളുടെ എണ്ണം 20ലേക്ക് ഉയർത്തുന്നതിനെ കുറിച്ച് ഐസിസി ആലോചിക്കുന്നു. നിലവിൽ 16 ടീമുകളാണ് മത്സരിക്കുന്നത്. എന്നാൽ ഈ വർഷം ഇന്ത്യയിൽ നിശ്ചയിച്ചിരിക്കുന്ന ലോകകപ്പിൽ 16 ടീമുകൾ തന്നെയാവും ഇറങ്ങുക. 

2024 ടി20 ലോകകപ്പിൽ 20 ടീമുകളെ പങ്കെടുപ്പിക്കാനുള്ള സാധ്യതയാണ് ഐസിസി പരിശോധിക്കുന്നത്. ഏകദിന ലോകകപ്പിൽ കളിക്കുന്ന ടീമുകളുടെ എണ്ണം വർധിപ്പിക്കുന്നതിനെ കുറിച്ചും ഐസിസി ആലോചിക്കുന്നുണ്ട്. 2019 ഏകദിന ലോകകപ്പിൽ ടീമുകളുടെ എണ്ണം 14ൽ നിന്ന് 10 ആയി കുറച്ചിരുന്നു. കുറവ് ടീമുകൾ കളിക്കുന്നതിനെ തുണച്ചുള്ള ബ്രോഡ്കാസ്റ്റേഴ്സിന്റെ നിലപാടാണ്  ഇതിന് ഇടയാക്കിയത്. 

എന്നാൽ ഏകദിന ലോകകപ്പിൽ മത്സരിക്കുന്ന ടീമുകളുടെ എണ്ണം 14ലേക്ക് തന്നെ ഉയർത്തുന്നതാണ് പരി​ഗണിക്കുന്നത്. 2021 ടി20 ലോകകപ്പിനുള്ള വേദി ഇന്ത്യയാണ്. എന്നാൽ കോവിഡ് വ്യാപനം ഇന്ത്യയിൽ ശക്തമായി നിൽക്കെ ടൂർണമെന്റ് ഇന്ത്യയിൽ വെച്ച് നടത്താനാവുമോ എന്ന ആശങ്ക ഉയർന്നിട്ടുണ്ട്. 

ഒക്ടോബർ-നവംബർ മാസങ്ങളിലായാണ് ലോകകപ്പ് ഇന്ത്യയിൽ നിശ്ചയിച്ചിരിക്കുന്നത്. ജൂണിലാവും സ്ഥിതി​ഗതികൾ വിലയിരുത്തി ഐസിസി വേദി മാറ്റുന്ന കാര്യത്തിൽ അന്തിമ തീരുമാനം എടുക്കുക. കഴിഞ്ഞ വർഷം ഓസ്ട്രേലിയയാണ് ടി20 ലോകകപ്പിന് വേദിയാവേണ്ടിയിരുന്നത്. എന്നാൽ കോവിഡ് വ്യാപനത്തിന്റെ സാഹചര്യത്തിൽ അത് മാറ്റിവെക്കുകയായിരുന്നു.