ഇൻഡോർ: വെസ്റ്റ് ഇൻഡീസിനെതിരായ മൂന്നാം ടി20 പോരാട്ടത്തിൽ 30 പന്തിൽ 69 റൺസ് അടിച്ച് അന്താരാഷ്ട്ര ടി20യിൽ ശ്രദ്ധേയ റെക്കോർഡുകളുമായി ഇന്ത്യൻ ഓപ്പണർ അഭിഷേക് ശർമ. വെറും 18 പന്തിൽ 50 റൺസിലെത്തി അഭിഷേക് മറ്റൊരു അതിവേഗ അർധ സെഞ്ച്വറിയും നേടിയിരുന്നു. ഇതിനൊപ്പം ടി20യിൽ അതിവേഗം 2000 റൺസ് നേടുന്ന (പന്തുകളുടെ അടിസ്ഥാനത്തിൽ) താരമെന്ന റെക്കോർഡാണ് അഭിഷേക് സ്ഥാപിച്ചത്. ഒപ്പം സിക്സുകളുടെ റെക്കോർഡിലും താരം എത്തി.
വെറും 1124 പന്തുകളിൽ നിന്നാണ് അഭിഷേക് 2000 റൺസ് അടിച്ചെടുത്തത്. മുൻ ഇന്ത്യൻ ടി20 നായകൻ സൂര്യകുമാർ യാദവിന്റെ റെക്കോർഡാണ് അഭിഷേക് പഴങ്കഥയാക്കിയത്. 1164 പന്തുകളിൽ നിന്നാണ് സൂര്യകുമാർ 2000 റൺസിലെത്തിയത്. മുൻ ഓസീസ് ക്യാപ്റ്റൻ ആരോൺ ഫിഞ്ചാണ് നേട്ടത്തിൽ മൂന്നാമൻ. 1283 പന്തുകളിൽ നിന്നാണ് ഫിഞ്ച് 2000 റൺസിലെത്തിയത്.
ഒരു കലണ്ടർ വർഷം ടി20യിൽ ഏറ്റവും കൂടുതൽ സിക്സുകൾ നേടുന്ന ഫുൾ മെമ്പർ രാജ്യങ്ങളിലെ ബാറ്റർ എന്ന റെക്കോർഡിലും അഭിഷേക് എത്തി. 2026ൽ അഭിഷേക് ഇതുവരെ 68 സിക്സുകൾ അടിച്ചുകൂട്ടി. 2022ൽ 68 സിക്സുകൾ നേടിയ സൂര്യകുമാർ യാദവിന്റെ റെക്കോർഡിനൊപ്പമാണ് അഭിഷേക് എത്തിയത്. നാലാം ടി20യിൽ ഒരു സിക്സർ കൂടി തൂക്കിയാൽ റെക്കോർഡ് അഭിഷേകിന് സ്വന്തമാകും.
പട്ടികയിൽ രണ്ടാം സ്ഥാനത്തും അഭിഷേക് തന്നെയാണ്. കഴിഞ്ഞ വർഷം താരം 54 സിക്സുകൾ തൂക്കിയതാണ് രണ്ടാമത്. 52 സിക്സുകൾ ഈ വർഷം നേടി ഇഷാൻ കിഷനും തൊട്ടുപിന്നിലുണ്ട്. നിലവിലെ പാകിസ്ഥാൻ ടി20 ക്യാപ്റ്റൻ സാഹിബ്സാദ ഫർഹാനും പട്ടികയിലുണ്ട്. 2025ൽ താരം 45 സിക്സുകൾ തൂക്കിയിരുന്നു.
ഇന്ത്യയുടെ ടി20 ടീമിലെ നിർണായക സാന്നിധ്യമാണ് അഭിഷേക്. 65 മത്സരങ്ങളിൽ നിന്നു 14 അർധ സെഞ്ച്വറികളും 3 സെഞ്ച്വറികളും താരം ഇതുവരെ നേടിയിട്ടുണ്ട്. മൂന്നാം ടി20യിൽ ആറ് ഫോറും അഞ്ച് സിക്സും സഹിതമാണ് താരം 30 പന്തിൽ 69 റൺസ് വാരിയത്. ഇന്ത്യയുടെ ടോപ് സ്കോററും അഭിഷേക് തന്നെ.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
