16 ​ഗോളുകൾ! മെസിയോ, എംബാപ്പെയോ? ക്ലോസെയെ ആര് മറികടക്കും

വാഷിങ്ടൺ: ഫിഫ ലോകകപ്പ് പോരാട്ടത്തിന്റെ ചരിത്രത്തിൽ ഏറ്റവും കൂടുതൽ ​ഗോളുകളെന്ന നേട്ടം ഇതിഹാസ ജർമൻ താരം മിറോസ്ലാവ് ക്ലോസെയുടെ പേരിലാണ്. 16 ​ഗോളുകൾ. ഈ ലോകകപ്പിൽ ക്ലോസെയുടെ റെക്കോർഡ് ആര് മറികടക്കുമെന്ന ആകാംക്ഷയിലാണ് ഫുട്ബോൾ ആരാധകർ.

അർജന്റീന നായകനും ഇതിഹാസവുമായ ലയണൽ മെസിയും ഫ്രാൻസ് സൂപ്പർ താരം കിലിയൻ എംബാപ്പെയും മത്സര രം​ഗത്തുണ്ട്. ഇതിൽ ആര് നേടുമെന്നാണ് ആരാധകർ ഉറ്റുനോക്കുന്നത്. ഇത്തവണ കൂടുതൽ ടീമുകളും മത്സരങ്ങളും ഉള്ളതിനാൽ ഇരുവർക്കും കൂടുതൽ അവസരങ്ങൾ ലഭിക്കും എന്നത് ഈ റെക്കോർഡ് പോരാട്ടത്തിന്റെ ആവേശം ഇരട്ടിയാക്കുന്നു.

ലയണൽ മെസിക്ക് നിലവിൽ 13 ​ഗോളുകളാണ് 6 ലോകകപ്പുകളിൽ നിന്നുള്ളത്. എംബാപ്പെ കരിയറിലെ മൂന്നാം ലോകകപ്പിനാണ് ഇറങ്ങുന്നത്. താരത്തിനു ഇപ്പോൾ തന്നെ 12 ​ഗോളുകളുണ്ട്. ക്ലോസെയുടെ റെക്കോർഡിനൊപ്പമെത്താൻ മെസിക്ക് ഇനി 3 ഗോളുകൾ കൂടി വേണം. റെക്കോർഡ് തകർക്കാൻ 4 ഗോളുകളും. എംബാപ്പെയ്ക്ക് റെക്കോർഡിനൊപ്പമെത്താൻ 4 ​ഗോളുകളും മറികടക്കാൻ 5 ​ഗോളുകളും വേണം.

2022ൽ അർജന്റീന കപ്പുയർത്തിയ ഖത്തർ ലോകകപ്പിൽ 7 ഗോളുകളാണ് മെസി അടിച്ചു കൂട്ടിയത്. നിലവിൽ ​ഗോൾ വേട്ടയിൽ മെസി ജസ്റ്റ് ഫോണ്ടെയ്നൊപ്പമാണ്. ഫ്രഞ്ച് താരമായ ജസ്റ്റ് ഫോണ്ടെയ്ൻ ഒറ്റ ലോകകപ്പിലാണ് 13 ​ഗോളുകൾ അടിച്ചത് എന്നതും ശ്രദ്ധേയമാണ്. ഈ റെക്കോർഡ് ഇരുവരും മറികടക്കുമോ എന്നതും അധിക കൗതുകമായി നിൽക്കുന്നു.

27 വയസുള്ള എംബാപ്പെയുടെ ലോകകപ്പിലെ ഗോൾ വേഗം അത്ഭുതപ്പെടുത്തുന്നതാണ്. 2018ൽ തന്റെ കന്നി ലോകകപ്പ് കളിക്കാനിറങ്ങിയ എംബാപ്പെ 4 ഗോളുകളാമ് നേടിയത്. 2022ൽ (ഫൈനലിലെ ഹാട്രിക് ഉൾപ്പെടെ) 8 ഗോളുകളും അദ്ദേഹം നേടി. ക്ലോസെയുടെ റെക്കോർഡ് തകർക്കുക മാത്രമല്ല, ഭാവിയിൽ ആർക്കും തകർക്കാൻ കഴിയാത്ത ഒരു പുതിയ നാഴികക്കല്ല് സ്ഥാപിക്കാനും എംബാപ്പെയ്ക്ക് സാധിച്ചേക്കും.

ലോകകപ്പ് ഗോൾ വേട്ടക്കാർ

1- മിറോസ്ലാവ് ക്ലോസെ: ജർമനി, 16 ഗോളുകൾ

2- റൊണാൾഡോ: ബ്രസീൽ, 15 ഗോളുകൾ

3- ഗെർഡ് മുള്ളർ: ജർമ്മനി, 14 ഗോളുകൾ

4- ലയണൽ മെസി: അർജന്റീന, 13 ഗോളുകൾ

4- ജസ്റ്റ് ഫോണ്ടെയ്ൻ: ഫ്രാൻസ്, 13 ഗോളുകൾ

6- കിലിയൻ എംബാപ്പെ: ഫ്രാൻസ്, 12 ഗോളുകൾ