പാനമയെ തകര്‍ത്ത് ഇംഗ്ലണ്ട്; ഡബിള്‍ അടിച്ച് ഗ്രൂപ്പ് ചാംപ്യന്‍മാര്‍

ന്യൂയോര്‍ക്ക്: ഫിഫ ലോകകപ്പില്‍ പാനമയെ തകര്‍ത്ത് ഇംഗ്ലണ്ട്. എല്‍ ഗ്രൂപ്പിലെ അവസാന പോരാട്ടത്തിലെ ജയത്തോടെ ഇംഗ്ലണ്ട് ഗ്രൂപ്പ് ചാംപ്യന്‍മാരായി. മറുപടിയില്ലാത്ത രണ്ടു ഗോളുകള്‍ക്കാണ് ഇംഗ്ലണ്ടിന്റെ വിജയം. 62-ാം മിനിറ്റില്‍ ജൂഡ് ബെല്ലിങ്ങാമും 67-ാം മിനിറ്റില്‍ ഹാരി കെയ്‌നുമാണ് ഇംഗ്ലണ്ടിനായി ഗോളുകള്‍ നേടിയത്.

ആദ്യ പകുതിയില്‍ പാനമ ഇംഗ്ലണ്ടിനെ സമനിലയില്‍ തളച്ചെങ്കിലും രണ്ടാം പകുതിയില്‍ ഇംഗ്ലണ്ട് ശക്തമായി തിരിച്ചടിക്കുകയായിരുന്നു. തോല്‍വിയറിയാതെയാണ് ഇംഗ്ലണ്ട് ലോകകപ്പ് നോക്കൗട്ടിലെത്തുന്നത്. രണ്ടു വിജയങ്ങളും ഒരു സമനിലയും സ്വന്തമാക്കിയ ഇംഗ്ലണ്ടിന് ഏഴു പോയിന്റാണുള്ളത്.

62-ാം മിനിറ്റില്‍ ബുകായോ സാക്ക എടുത്ത കോര്‍ണര്‍ കിക്കില്‍ നിന്നാണ് ഇംഗ്ലണ്ട് ആദ്യ ലീഡെടുത്തത്. പന്തു ലഭിച്ച ജൂഡ് ബെലിങ്ങാം പോസ്റ്റിന്റെ മൂലയിലേക്ക് തട്ടിയിടുകയായിരുന്നു. അഞ്ചു മിനിറ്റുകള്‍ക്കപ്പുറം ക്യാപ്റ്റന്‍ ഹാരി കെയ്ന്‍ വഴി ഇംഗ്ലണ്ട് ലീഡ് രണ്ടാക്കി ഉയര്‍ത്തി. ഈ ഗോളിന് വഴിയൊരുക്കിയത് ജൂഡ് ബെല്ലിങ്ങാമാണ്. ജൂഡ് ബെല്ലിങ്ങാമാണ് കളിയിലെ താരം. കളിച്ച മൂന്നു മത്സരങ്ങളും തോറ്റ പാനമ ലോകകപ്പില്‍നിന്നു പുറത്തായി.