ക്രിക്കറ്റ് ലോകകപ്പുകളുടെ മത്സര ക്രമത്തില് വമ്പന് പരിഷ്കാരങ്ങളുമായി അന്താരാഷ്ട്ര ക്രിക്കറ്റ് കൗണ്സില്. എഡിന്ബര്ഗില് നടന്ന ഐസിസിയുടെ വാര്ഷിക യോഗത്തിലാണ് പുരുഷ ഏകദിന ലോകകപ്പിന്റെയും ടി20 ലോകകപ്പിന്റെയും ഘടന പൂര്ണമായി മാറ്റിയെഴുതാന് തീരുമാനിച്ചത്. ടൂര്ണമെന്റുകളിലെ ആവേശം കൂട്ടാനും, പ്രവചനാതീതമായ മത്സരങ്ങള് ഉറപ്പാക്കാനും ലക്ഷ്യമിട്ടാണ് ഈ മാറ്റങ്ങള്. 2027ലെ പുരുഷ ഏകദിന ലോകകപ്പിലും 2028ലെ ടി20 ലോകകപ്പിലും പുതിയ ഫോര്മാറ്റുകളായിരിക്കും നടപ്പാക്കുക.
ഏകദിന ലോകകപ്പ്: 'സൂപ്പര് സീരീസും' 'സൂപ്പര് 7' ഫോര്മാറ്റും
2027ല് ദക്ഷിണാഫ്രിക്ക, സിംബാബ്വെ, നമീബിയ എന്നീ രാജ്യങ്ങള് സംയുക്തമായി ആതിഥേയത്വം വഹിക്കുന്ന ഏകദിന ലോകകപ്പില് ആകെ 14 ടീമുകളാണ് പങ്കെടുക്കുക. എന്നാല് സെമി ഫൈനലിലേക്കുള്ള വഴി ഇനി അത്ര എളുപ്പമാകില്ല.
റൗണ്ട് 1 (സൂപ്പര് സീരീസ്): യോഗ്യത നേടിയവരില് ഏറ്റവും കുറഞ്ഞ റാങ്കിലുള്ള മൂന്ന് ടീമുകള് (12, 13, 14 റാങ്കുകാര്) തമ്മില് ആദ്യം ഒരു 'സൂപ്പര് സീരീസ്' റൗണ്ട് റോബിന് മത്സരം കളിക്കും. ഇതില് ഒന്നാമതെത്തുന്ന ടീമിന് മാത്രമേ പ്രധാന ടൂര്ണമെന്റിലേക്ക് പ്രവേശനമുണ്ടാകൂ. ബാക്കി രണ്ട് ടീമുകള് ആദ്യമേ പുറത്താകും.
റൗണ്ട് 2 (ഗ്രൂപ്പ് ഘട്ടം): ആദ്യ ഘട്ടത്തില് നിന്ന് ജയിച്ചു കയറിയ ഒരു ടീമും ബാക്കി 11 മുന്നിര ടീമുകളും ഉള്പ്പെടെ ആകെ 12 ടീമുകളെ 6 ടീമുകള് വീതമുള്ള രണ്ട് ഗ്രൂപ്പുകളായി തിരിക്കും.
റൗണ്ട് 3 (സൂപ്പര് 7): രണ്ട് ഗ്രൂപ്പുകളിലെയും ആദ്യ മൂന്ന് സ്ഥാനങ്ങളില് എത്തുന്ന ടീമുകളും (ആകെ 6 ടീമുകള്), അതോടൊപ്പം രണ്ട് ഗ്രൂപ്പുകളിലുമായി ഏറ്റവും മികച്ച പോയിന്റുള്ള അടുത്ത ഒരു ടീമും ചേര്ന്ന് ആകെ 7 ടീമുകള് 'സൂപ്പര് 7' ഘട്ടത്തിലേക്ക് യോഗ്യത നേടും. ഈ 7 ടീമുകള് പരസ്പരം മത്സരിക്കുന്ന റൗണ്ട് റോബിന് രീതിയായിരിക്കും ഇത്. ഇതില് ആദ്യ 4 സ്ഥാനങ്ങളില് എത്തുന്നവര് സെമി ഫൈനലിലേക്ക് മുന്നേറും.
പുതിയ ഫോര്മാറ്റ് അനുസരിച്ച് ഇന്ത്യ 'സൂപ്പര് 7'ല് എത്തുകയാണെങ്കില്, സെമിക്ക് മുന്പ് തന്നെ കുറഞ്ഞത് 11 മത്സരങ്ങളെങ്കിലും കളിക്കുമെന്ന് ഉറപ്പാണ്. ഇന്ത്യ-പാകിസ്താന് പോരാട്ടങ്ങള് ഒന്നിലധികം തവണ കാണാനുള്ള സാധ്യതയും ഇത് വര്ദ്ധിപ്പിക്കുന്നു.
ടി20 ലോകകപ്പ്: 'സൂപ്പര് 8' മാറി ഇനി 'സൂപ്പര് 10' ഉം എലിമിനേറ്ററുകളും
2028ല് ഓസ്ട്രേലിയയിലും ന്യൂസിലന്ഡിലുമായി നടക്കുന്ന ടി20 ലോകകപ്പിലാണ് വന് അഴിച്ചുപണി നടക്കുന്നത്. 20 ടീമുകള് പങ്കെടുക്കുന്ന ടൂര്ണമെന്റിന്റെ ഘടന അടിമുടി മാറും. മുന്പ് 5 ടീമുകള് വീതമുള്ള 4 ഗ്രൂപ്പുകളായിരുന്നെങ്കില്, ഇനി മുതല് 4 ടീമുകള് വീതമുള്ള 5 ഗ്രൂപ്പുകളായിരിക്കും ഉണ്ടാവുക. ഓരോ ഗ്രൂപ്പിലെയും ആദ്യ രണ്ട് സ്ഥാനക്കാര് അടുത്ത ഘട്ടത്തിലേക്ക് കടക്കും. ഗ്രൂപ്പുകള് ചെറുതാകുന്നതോടെ ഓരോ മത്സരത്തിന്റെയും പ്രാധാന്യം വര്ധിക്കും.
'സൂപ്പര് 10' ഘട്ടം: നിലവിലുണ്ടായിരുന്ന 'സൂപ്പര് 8' ഘട്ടത്തിന് പകരമാണ് 'സൂപ്പര് 10' വരുന്നത്. യോഗ്യത നേടുന്ന 10 ടീമുകളെ 5 ടീമുകള് വീതമുള്ള രണ്ട് ഗ്രൂപ്പുകളായി തിരിക്കും.
നേരിട്ടുള്ള സെമി പ്രവേശനവും എലിമിനേറ്ററുകളും: രണ്ട് സൂപ്പര് 10 ഗ്രൂപ്പുകളിലും ഒന്നാം സ്ഥാനത്ത് ഫിനിഷ് ചെയ്യുന്ന രണ്ട് ടീമുകള്ക്ക് നേരിട്ട് സെമി ഫൈനലിലേക്ക് പ്രവേശനം ലഭിക്കും. എന്നാല് രണ്ടാമത്തെയും മൂന്നാമത്തെയും സ്ഥാനങ്ങളില് എത്തുന്ന ടീമുകള്ക്ക് (രണ്ട് ഗ്രൂപ്പുകളില് നിന്നുമായി ആകെ 4 ടീമുകള്) പരസ്പരം 'എലിമിനേറ്റര്' മത്സരങ്ങള് കളിക്കേണ്ടി വരും. ഇതില് ജയിക്കുന്ന രണ്ട് ടീമുകള് കൂടി സെമി ഫൈനല് ലൈനപ്പ് പൂര്ത്തിയാക്കും.
എന്തുകൊണ്ട് ഈ മാറ്റങ്ങള്?
ടൂര്ണമെന്റിന്റെ ആദ്യ ഘട്ടങ്ങളില് തന്നെ പ്രമുഖ ടീമുകള് പുറത്താകുന്നതും, അപ്രധാന മത്സരങ്ങള് വര്ധിക്കുന്നതും തടയാനാണ് ഐസിസിയുടെ ഈ നീക്കം. വലിയ ടീമുകള് തമ്മില് കൂടുതല് മത്സരങ്ങള് വരുന്നത് വഴി ടൂര്ണമെന്റിന്റെ ആവേശം അവസാനം വരെ നിലനിര്ത്താനും ബ്രോഡ്കാസ്റ്റര്മാര്ക്ക് കൂടുതല് വരുമാനം ഉറപ്പാക്കാനും ഈ ഫോര്മാറ്റിലൂടെ സാധിക്കും. 2028 ടി20 ലോകകപ്പിലേക്ക് ഇന്ത്യ, ഓസ്ട്രേലിയ, പാകിസ്താന് ഉള്പ്പെടെ 12 ടീമുകള് ഇതിനകം നേരിട്ട് യോഗ്യത നേടിയിട്ടുണ്ട്. ശേഷിക്കുന്ന 8 സ്ഥാനങ്ങള്ക്കായുള്ള യോഗ്യതാ മത്സരങ്ങളും കടുപ്പമേറിയതായിരിക്കും. ഐസിസി ബോര്ഡ് അംഗീകരിച്ച പുതിയ നിര്ദ്ദേശങ്ങള്ക്ക് ഒക്ടോബര്-നവംബര് മാസങ്ങളില് നടക്കുന്ന ഫിനാന്സ് കമ്മിറ്റിയുടെ യോഗത്തോടെ അന്തിമ അംഗീകാരം ലഭിക്കും.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
