20 വർഷത്തെ കാത്തിരിപ്പിന് വിരാമം; ഇന്ത്യ എഎഫ്സി അണ്ടർ 20 ഏഷ്യൻ കപ്പ് ഫുട്ബോൾ പോരിലേക്ക്

താഷ്കന്റ്: എഎഫ്സി അണ്ടർ 20 ഏഷ്യൻ കപ്പ് ഫുട്ബോൾ പോരാട്ടത്തിനു യോ​ഗ്യത സ്വന്തമാക്കി ഇന്ത്യ. 20 വർഷത്തെ കാത്തിരിപ്പിനു ശേഷമാണ് ഇന്ത്യ യോ​ഗ്യത സ്വന്തമാക്കുന്നത്. താഷ്കന്റിൽ നടന്ന ​ഗ്രൂപ്പ് ബി പോരാട്ടത്തിൽ ഇന്ത്യ ബം​ഗ്ലാദേശിനെ മറുപടിയില്ലാത്ത 3 ​ഗോളുകൾക്ക് തകർത്താണ് യോ​ഗ്യത നേടിയത്.

ഡാനി മെയ്‍തെയ് ലൈശ്രാം, വിശാൽ യാദവ്, പകരക്കാരനായി ഇറങ്ങിയ മുഹമ്മദ് അർബാഷ് എന്നിവരാണ് ഇന്ത്യക്കായി ലക്ഷ്യം കണ്ടത്. ജയത്തോടെ ഇന്ത്യ ​ഗ്രൂപ്പിൽ രണ്ടാം സ്ഥാനം സ്വന്തമാക്കിയാണ് യോ​ഗ്യത ഉറപ്പാക്കിയത്. അടുത്ത വർഷം ചൈനയിലാണ് എഎഫ്സി അണ്ടർ 20 ഏഷ്യൻ കപ്പ് പോരാട്ടം അരങ്ങേറുന്നത്.

മൂന്ന് മത്സരങ്ങളിൽ നിന്നു ആറ് പോയിന്റാണ് ഇന്ത്യ നേടിയത്. സിറിയയെ വീഴ്ത്തി ഒൻപത് പോയിന്റുമായി ഉസ്ബെക്കിസ്ഥാനാണ് ​ഗ്രൂപ്പിൽ ഒന്നാം സ്ഥാനത്തെത്തിയത്. എട്ട് യോ​ഗ്യതാ ​ഗ്രൂപ്പുകളിലെ മികച്ച ഏഴ് രണ്ടാം സ്ഥാനക്കാരിൽ ഒരു ടീമായാണ് ഇന്ത്യ യോ​ഗ്യത ഉറപ്പിച്ചത്.

മത്സരത്തിലേക്ക് വന്നാൽ കളിയുടെ 25ാം മിനിറ്റിൽ മെയ്തെയ് ലൈശ്രാം ആണ് ഇന്ത്യക്ക് ലീഡ് സമ്മാനിക്കുന്നത്. 60ാം മിനിറ്റിൽ വിശാൽ യാദവും 79ാം മിനിറ്റിൽ മുഹമ്മദ് അർബാഷും പട്ടിക പൂർത്തിയാക്കി.