നഗോയ: 44 വര്‍ഷമായി കാത്തിരിക്കുന്ന സ്വര്‍ണ മെഡല്‍ ഒടുവില്‍ ഇന്ത്യ പിടിച്ചെടുത്തു. ഏഷ്യന്‍ ഗെയിംസ് വനിതാ ഹോക്കിയില്‍ ഇന്ത്യ സുവര്‍ണ നേട്ടം സ്വന്തമാക്കി പുതു ചരിത്രമെഴുതി. ഫൈനലില്‍ ചൈനയെ 1-0ത്തിനു വീഴ്ത്തിയാണ് ഇന്ത്യന്‍ വനിതാ സംഘം അഭിമാന നേട്ടത്തിലെത്തിയത്. 1982ല്‍ വനിതാ ടീം ഏഷ്യന്‍ ഗെയിംസ് സ്വര്‍ണം സ്വന്തമാക്കിയ ശേഷം ആദ്യമായാണ് ഈയിനത്തിലെ ഇന്ത്യയുടെ സുവര്‍ണ മുന്നേറ്റം.
അപരാജിത കുതിപ്പാണ് ഏഷ്യന്‍ ഗെയിംസില്‍ ഇന്ത്യയും ചൈനയും നടത്തിയത്. ഫൈനലില്‍ ലോക നാലാം നമ്പര്‍ ടീമായ ചൈനയുടെ കരുത്തിനെ കൂസാതെ പോരാടാന്‍ ലോക റാങ്കിങില്‍ എട്ടാം സ്ഥാനത്തുള്ള ഇന്ത്യന്‍ വനിതാ സംഘത്തിനു സാധിച്ചു. ആദ്യ ക്വാര്‍ട്ടറില്‍ തന്നെ ഇന്ത്യ മുന്നിലെത്തി. ലാല്‍റെംസിയാമിയാണ് ഇന്ത്യക്ക് ലീഡ് സമ്മാനിച്ചത്. താരത്തിന്റെ രാജ്യത്തിനായുള്ള 200ാം അന്താരാഷ്ട്ര മത്സരം കൂടിയായിരുന്നു ഫൈനല്‍ എന്നതും സവിശേഷതയായി. ചൈനയുടെ പെനാല്‍റ്റി കോര്‍ണറുകള്‍ ഗോളിലേക്ക് പോകാതെ തടുത്തിട്ട് ഇന്ത്യന്‍ ഗോള്‍ കീപ്പര്‍ സവിതയും മത്സരത്തില്‍ നിര്‍ണായകമായി. പിന്നീട് ലീഡ് വിടാതെ ഇന്ത്യ സ്വര്‍ണം പിടിച്ചെടുക്കുകയായിരുന്നു.
ഇതോടെ ഇന്ത്യയുടെ ആകെ സ്വര്‍ണ നേട്ടം 16ല്‍ എത്തി. ആകെ മെഡല്‍ നേട്ടം 76ലും. 16 സ്വര്‍ണം, 25 വെള്ളി, 35 വെങ്കലം മെഡലുകളാണ് ഇന്ത്യയുടെ നിലവിലെ നേട്ടം. മെഡല്‍ പട്ടികയില്‍ ഇന്ത്യ അഞ്ചാം സ്ഥാനത്ത്.
1982നു ശേഷം ഇതാദ്യമായി ഇന്ത്യന്‍ വനിതാ ടീം ഏഷ്യന്‍ ഗെയിംസ് സ്വര്‍ണം സ്വന്തമാക്കി ചരിത്രം തിരുത്തിയെഴുതി. 1982ലാണ് ആദ്യമായി വനിതാ പോരാട്ടം ഏഷ്യന്‍ ഗെയിംസിന്റെ ഭാഗമാകുന്നത്. പ്രഥമ അധ്യായത്തിലാണ് ആദ്യമായും അവസാനമായും ഇന്ത്യ സ്വര്‍ണം നേടിയത്. 1998ലും 2018ലും ഇന്ത്യ ഫൈനലിലെത്തിയെങ്കിലും തോല്‍വിയായിരുന്നു ഫലം. രണ്ട് എഡിഷനിലും ഇന്ത്യയുടെ നേട്ടം വെള്ളിയില്‍ ഒതുങ്ങി.
2026 ഇന്ത്യന്‍ വനിതാ ടീമിനെ സംബന്ധിച്ച് മികച്ച വര്‍ഷം കൂടിയായി മാറി. നേരത്തെ ഇന്ത്യ എഐഎഫ് ദേശീയ കിരീടം സ്വന്തമാക്കിയ ഇന്ത്യന്‍ വനിതകള്‍ ഈ വര്‍ഷം അരങ്ങേറിയ ലോകകപ്പില്‍ അഞ്ചാം സ്ഥാനത്തും എത്തിയിരുന്നു. 52 വര്‍ഷത്തിനു ശേഷമാണ് ഇന്ത്യ ലോകകപ്പില്‍ ഇത്രയും മികച്ച പ്രകടനം പുറത്തെടുത്തത്. പിന്നാലെയാണ് ഏഷ്യന്‍ ഗെയിംസ് സ്വര്‍ണം.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
