മുംബൈ: ഐപിഎല്ലില്‍ സഞ്ജുവിന്റെ തിരിച്ചുവരവിനെ കുറിച്ച് പ്രതികരിച്ച് പരിശീലകന്‍ രാഹുല്‍ ദ്രാവിഡ്. സഞ്ജു സാംസണിന്റെ ആരോഗ്യ സ്ഥിതി കൃത്യമായി നിരീക്ഷിച്ചുവരികയാണെന്നും ദിവസേനയുള്ള റിപ്പോര്‍ട്ടുകളുടെ അടിസ്ഥാനത്തില്‍ മാത്രമേ കൂടുതല്‍ പറയാന്‍ സാധിക്കൂവെന്നും രാഹുല്‍ ദ്രാവിഡ് പറഞ്ഞു.
ഇന്ന് മുംബൈക്കെതിരായ മത്സരത്തില്‍ സഞ്ജു കളിക്കുന്ന കാര്യത്തില്‍ തീരുമാനമായിട്ടില്ല. രാജസ്ഥാന് പ്ലേ ഓഫില്‍ എത്തണമെങ്കില്‍ വിജയം അനിവാര്യമാണെങ്കിലും സഞ്ജുവിനെ തിരക്കിട്ട് ടീമില്‍ തിരിച്ചെത്തിക്കില്ലെന്ന സൂചനയാണ് പുറത്തു വരുന്നത്.
'സഞ്ജുവിന്റെ പരിക്ക് ഭേദമാകുന്നുണ്ട്. പക്ഷേ, ദിനംപ്രതിയുള്ള വിലയിരുത്തലുകളിലൂടെ മാത്രമേ അതേക്കുറിച്ച് കൂടുതല്‍ എന്തെങ്കിലും പറയാനാകൂ. വാരിയെല്ലിനാണ് പരിക്കേറ്റിരിക്കുന്നത്. അത് കുറച്ചധികം ഗൗരവത്തോടെ കാണേണ്ട പരിക്കാണ്. അതുകൊണ്ട് സഞ്ജുവിനെ തിരക്കിട്ട് കളത്തില്‍ തിരിച്ചെത്തിക്കാന്‍ രാജസ്ഥാന് റോയല്‍സ് ശ്രമിക്കില്ല' ദ്രാവിഡ് പറഞ്ഞു.
ഡല്‍ഹി ക്യാപിറ്റല്‍സിനെതിരായ മത്സരത്തിനിടെയാണ് സഞ്ജുവിന് പരിക്കേറ്റത്. ബാറ്റിങ്ങിനിടെ വേദനയെ തുടര്‍ന്ന് സഞ്ജു മൈതാനം വിട്ടിരുന്നു. വാരിയെല്ലിനേറ്റ പരിക്കേുമൂലം കഴിഞ്ഞ 3 മത്സരങ്ങളില്‍ സഞ്ജുവിനു കളിക്കാന്‍ സാധിച്ചില്ല. സഞ്ജുവിന്റെ ദീര്‍ഘകാല ഫിറ്റ്‌നെസാണ് പ്രധാനമെന്നും രാഹുല്‍ ദ്രാവിഡ് വ്യക്തമാക്കി.
സഞ്ജുവിന്റെ അസാന്നിധ്യത്തില്‍ രാജസ്ഥാന് കളിച്ച മൂന്നു മത്സരങ്ങളില്‍ അവര്‍ക്ക് ജയിക്കാനായത് ഗുജറാത്ത് ടൈറ്റന്‍സിനെതിരായ അവസാന മത്സരം മാത്രമാണ്. പതിനാലുകാരന്‍ താരം വൈഭവ് സൂര്യവംശിയുടെ റെക്കോര്‍ഡ് സെഞ്ചറി പ്രകടനമാണ് അന്ന് രാജസ്ഥാന് വിജയത്തില്‍ നിര്‍ണായകമായത്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
