ബനോനി: ദക്ഷിണാഫ്രിക്കയ്ക്കെതിരായ മൂന്നാം യൂത്ത് ഏകദിനത്തില് ഇന്ത്യന് ക്യാപ്റ്റന് വൈഭവ് സൂര്യവംശിക്കും മലയാളി താരം ആരോണ് ജോര്ജിനും തകര്പ്പന് സെഞ്ച്വറി. 63 പന്തുകളിലാണ് വൈഭവ് സെഞ്ച്വറിയിലെത്തിയത്. മത്സരത്തില് 74 പന്തുകള് നേരിട്ട വൈഭവ് 127 റണ്സടിച്ച് പുറത്തായത്. 10 സിക്സുകളും ഒന്പതു ഫോറുകളും അടങ്ങുന്നതാണ് വൈഭവിന്റെ ഇന്നിങ്സ്.
91 പന്തുകളില് നിന്നാണ് മലയാളിതാരം ആരോണ് സെഞ്ച്വറി നേടിയത്. 118 റണ്സ് നേടി താരം പുറത്തായി. ആരോണ് ജോര്ജ് 16 ഫോറുകളാണ് അടിച്ചത്. മത്സരം 40 ഓവറുകള് പിന്നിടുമ്പോള് മൂന്ന് വിക്കറ്റ് നഷ്ടത്തില് ഇന്ത്യ മുന്നൂറ് റണ്സ് കടന്നു. വേദാന്ത് ത്രിവേദി 34 റണ്സും അഭിഗ്യാന് കുണ്ടു ആറ് റണ്സിനും ഹര്വന്ഷ് പന്ഗാലിയ രണ്ട് റണ്സിനും പുറത്തായി.
ആദ്യ പന്തില് തന്നെ ബൗണ്ടറി അടിച്ചാണ് വൈഭവ് ഇന്നിങ്സിനു തുടക്കമിട്ടത്. ഇന്ത്യന് ക്യാപ്റ്റനു പിന്തുണയുമായി ആരോണ് ജോര്ജും ചേര്ന്നതോടെ ഇന്ത്യയ്ക്കു പിന്നീടു തിരിഞ്ഞുനോക്കേണ്ടിവന്നില്ല. വൈഭവ് വെടിക്കെട്ടിനു തിരികൊളുത്തിയതോടെ സ്റ്റേഡിയത്തിനു പുറത്തുപോയ പന്ത് എടുക്കാന് വേണ്ടി കുറച്ചുനേരം കളി നിര്ത്തിവയ്ക്കേണ്ടിവന്നു. ആദ്യ ആറോവറില് ഇന്ത്യ 50 പിന്നിട്ടു. കോര്നെ ബോതയെ ബൗണ്ടറി കടത്തിയ വൈഭവ് 24 പന്തുകളില്നിന്നാണ് അര്ധ സെഞ്ച്വറിയിലെത്തിയത്. പിന്നീടത്തെ 39 പന്തുകളില് താരം സെഞ്ചറി പിന്നിട്ടു. എട്ടു സിക്സുകളും ആറു ഫോറുകളുമാണ് 100 കടക്കാന് വൈഭവ് അടിച്ചുകൂട്ടിയത്.
മത്സരത്തിന്റെ 26ാം ഓവറില് എന്റ്റാന്ഡോ സോണിയുടെ പന്തില് വൈഭവ് പുറത്തായിമടങ്ങി. മത്സരത്തില് ടോസ് നേടിയ ദക്ഷിണാഫ്രിക്ക ഇന്ത്യയെ ബാറ്റിങ്ങിനു വിടുകയായിരുന്നു. മൂന്നു മത്സരങ്ങളുള്ള പരമ്പര നേരത്തേ 2- 0ന് ഇന്ത്യ വിജയിച്ചിട്ടുണ്ട്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
