ന്യൂഡല്ഹി: വരാനിരിക്കുന്ന ഫുട്ബോള് ലോകകപ്പില് കേരളത്തില് നിന്ന് ഖത്തര് ടീമിനും ആരാധകര് ഉണ്ടാവും. കാരണമെന്ത് എന്ന് ചോദിച്ചാല് അതിന് ഒരു ഉത്തരം മാത്രം. മലയാളി താരമായ തഹ്സീന് മുഹമ്മദ്.
ഒരു മലയാളി താരത്തിന്റെ ലോകകപ്പ് അരങ്ങേറ്റം കാണാന് കാത്തിരിക്കുകയാണ് കേരളം. അമേരിക്കന് ലോകകപ്പില് ഖത്തറിന് വേണ്ടി കണ്ണൂര് സ്വദേശി കളിക്കാനിറങ്ങും. കണ്ണൂര് തലശ്ശേരി സ്വദേശി തഹ്സീന് മുഹമ്മദാണ് കളിക്കാനിറങ്ങുക. ലോകകപ്പ് സംഘത്തില് ഉള്പ്പെടുന്ന ആദ്യ മലയാളിയെന്ന റെക്കോര്ഡാണ് ഇതോടെ തഹ്സീന് മുഹമ്മദ് സ്വന്തമാക്കിയത്.
കണ്ണൂര് സ്വദേശി ജംഷീദിന്റെയും ഷൈമയുടെയും മകനാണ് 19-കാരനായ തഹ്സീന് മുഹമ്മദ്. ഖത്തര് ലീഗില് അല് ദുഹൈല് താരമാണ് അദ്ദേഹം. തഹ്സീന് മുഹമ്മദ് ജനിച്ചതും വളര്ന്നതുമെല്ലാം ഖത്തറിലാണ്. ചെറുപ്രായത്തില് തന്നെ ഖത്തര് യൂത്ത് ടീമുകളില് തഹ്സിന് കളിച്ചിരുന്നു. ഖത്തര് ദേശീയ ടീമിനായി അണ്ടര് 16, അണ്ടര് 17, അണ്ടര് 19 വിഭാഗങ്ങളിലും തഹ്സിന് മുഹമ്മദ് കളിച്ചിട്ടുണ്ട്.
1996ലാണ് കുടുംബം ഖത്തറിലേക്ക് കുടിയേറിയത്. അവിടെയാണ് തഹ്സിന് ജനിച്ചതും തന്റെ ഫുട്ബോള് യാത്രയ്ക്ക് തുടക്കം കുറിച്ചതും. ദോഹയില് വളര്ന്ന തഹ്സിന് ആ രാജ്യവുമായി എന്നും ആഴത്തിലുള്ളൊരു ആത്മബന്ധമുണ്ട്. ഖത്തര് പൗരത്വമുള്ള തഹ്സിന് ഏറെ അഭിമാനത്തോടെയാണ് ഖത്തറിനെ തന്റെ സ്വന്തം രാജ്യമെന്ന് വിശേഷിപ്പിക്കുന്നത്. ഖത്തറിലെ മികച്ച കളിക്കാരെ വാര്ത്തെടുക്കുന്നതില് പേരുകേട്ട പ്രശസ്തമായ 'ആസ്പയര് ഫുട്ബോള് അക്കാദമി'യിലാണ് തഹ്സിന് പരിശീലനം നേടിയത്. പണ്ട് കാലിക്കറ്റ് യൂണിവേഴ്സിറ്റിയെ പ്രതിനിധീകരിച്ച് കളിച്ചിട്ടുള്ള, മികച്ചൊരു ഫുട്ബോള് കളിക്കാരന് കൂടിയായ പിതാവാണ് തഹ്സിന്റെ ഏറ്റവും വലിയ പ്രചോദനങ്ങളിലൊരാള്.
പ്രധാനമായും ലെഫ്റ്റ് വിങ്ങില് (ഇടത് വശത്ത്) കളിക്കാന് ഇഷ്ടപ്പെടുന്ന, പന്തുമായി എതിരാളികളെ വെട്ടിയൊഴിഞ്ഞു പോകുന്നതില് അതീവ മിടുക്കനായ ഒരു വിങ്ങറാണ് തഹ്സിന്. പ്രതിരോധക്കാരെ മറികടന്ന് മുന്നേറാനും ഗോളവസരങ്ങള് സൃഷ്ടിക്കാനുമുള്ള തഹ്സിന്റെ കഴിവും വേഗതയും, വരും വര്ഷങ്ങളില് ഫുട്ബോള് ലോകം ഏറെ ശ്രദ്ധയോടെ നോക്കിക്കാണുന്ന ഒരു കളിക്കാരനായി അദ്ദേഹത്തെ മാറ്റുമെന്നാണ് ആരാധകര് പ്രതീക്ഷിക്കുന്നത്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
