മുംബൈ: സെലക്ഷന്‍ കമ്മിറ്റിയിലേക്ക് പുതിയ അംഗങ്ങളെ തേടി ബിസിസിഐ. ഇതിനായി ഇന്ത്യന്‍ ക്രിക്കറ്റ് ബോര്‍ഡ് അപേക്ഷ ക്ഷണിച്ചു. സെപ്റ്റംബര്‍ 10നുള്ളില്‍ അപേക്ഷ നല്‍കണം.
പുരുഷ ടീമിനെ തിരഞ്ഞെടുക്ക കമ്മിറ്റിയിലേക്ക് പുതിയതായി രണ്ട് അംഗങ്ങളേയും വനിതാ ടീം സെലക്ഷന്‍ കമ്മിറ്റിയിലേക്ക് നാല് അംഗങ്ങളേയുമാണ് വേണ്ടത്. ജൂനിയര്‍ പുരുഷ ടീം സെലക്ഷന്‍ കമ്മിറ്റിയിലേക്ക് ഒരൊഴിവുമുണ്ട്.
ഏഴ് ടെസ്റ്റുകളും 30 ഫസ്റ്റ് ക്ലാസ് മത്സരങ്ങളും അല്ലെങ്കില്‍ 10 ഏകദിനവും 20 ഫസ്റ്റ് ക്ലാസ് മത്സരങ്ങളും കളിച്ചവര്‍ക്കാണ് പുരുഷ കമ്മിറ്റിയിലേക്ക് അപേക്ഷിക്കാനുള്ള യോഗ്യത. വനിതാ, ജൂനിയര്‍ ടീം സെലക്ഷന്‍ അംഗത്തിനു പ്രത്യേക നിബന്ധകളില്ല.
പുരുഷ സെലക്ഷന്‍ കമ്മിറ്റിയില്‍ സൗത്ത് സോണ്‍ പ്രതിനിധിയായ ശ്രീധര്‍ ശരത്തിനു പകരമാണ് പുതിയ അംഗത്തെ നിയമിക്കുന്നത്. മുന്‍ സ്പിന്നര്‍ പ്രഗ്യാന്‍ ഓജ ഈ സ്ഥാനത്തേക്ക് എത്തുമെന്നാണ് നിലവില്‍ പ്രതീക്ഷിക്കപ്പെടുന്നത്.
പുരുഷ ടീം സെലക്ഷന്‍ കമ്മിറ്റി ചെയര്‍മാന്‍ സ്ഥാനത്ത് അജിത് അഗാര്‍ക്കര്‍ തുടരും. മുന്‍ പേസറുടെ കാലാവധി 2026 വരെ നീട്ടി നല്‍കിയിട്ടുണ്ട്. മുന്‍ ഇടം കൈയന്‍ സ്പിന്നര്‍ നീതു ഡേവിഡാണ് വനിതാ ടീം സെലക്ഷന്‍ കമ്മിറ്റി ചെയര്‍പേഴ്‌സന്‍. ഇവരടക്കമുള്ളവര്‍ക്ക് പകരമാണ് പുതിയ നാല് അംഗങ്ങളെ നിയമിക്കാനൊരുങ്ങുന്നത്. നിലവിലെ എല്ലാ സെലക്ഷന്‍ കമ്മിറ്റികളുടേയും കാലാവധി സെപ്റ്റംബറില്‍ അവസാനിക്കും.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
