സിഡ്‌നി: ടെസ്റ്റ് ക്രിക്കറ്റില്‍ ശ്രദ്ധേയമായൊരു നാഴികക്കല്ല് പിന്നിട്ട് ഇന്ത്യന്‍ മധ്യനിര ബാറ്റ്‌സ്മാന്‍ ചേതേശ്വര്‍ പൂജാര. അന്താരാഷ്ട്ര ടെസ്റ്റ് മത്സരങ്ങളില്‍ പൂജാര 6000 റണ്‍സ് പിന്നിട്ടു. ഓസ്‌ട്രേലിയക്കെതിരായ മൂന്നാം ക്രിക്കറ്റ് ടെസ്റ്റിലാണ് പൂജാര 6000 ക്ലബില്‍ അംഗമായത്.
ഓസീസിനെതിരായ മൂന്നാം ടെസ്റ്റിന്റെ രണ്ടാം ഇന്നിങ്‌സില്‍ 70 റണ്‍സെടുത്തതോടെയാണ് പൂജാരയുടെ നേട്ടം. 32കാരനായ വലം കൈ ബാറ്റ്‌സ്മാന്‍ ഓസീസ് താരം നതാന്‍ ലിയോണിനെ ബൗണ്ടറി കടത്തിയാണ് ശ്രദ്ധേയ നേട്ടത്തിലെത്തിയത്. ഇതോടെ ടെസ്റ്റില്‍ 6000 റണ്‍സ് പിന്നിടുന്ന പതിനൊന്നാമത്തെ ഇന്ത്യന്‍ താരമായും പൂജാര മാറി.
134 ഇന്നിങ്‌സുകളില്‍ നിന്നാണ് പൂജാര 6000 റണ്‍സില്‍ എത്തിയത്. ഏറ്റവും വേഗത്തില്‍ ഈ നേട്ടത്തിലെത്തുന്ന ആറാമത്തെ ഇന്ത്യന്‍ താരമെന്ന പെരുമയും ഇതിനൊപ്പം താരത്തിന് സ്വന്തമായി. സുനില്‍ ഗവാസ്‌കര്‍ (117), വിരാട് കോഹ്‌ലി (119), സച്ചിന്‍ ടെണ്ടുല്‍ക്കര്‍ (120), വീരേന്ദര്‍ സെവാഗ് (123), രാഹുല്‍ ദ്രാവിഡ് (125) എന്നിവരാണ് പൂജാരയേക്കാള്‍ കുറഞ്ഞ ഇന്നിങ്‌സില്‍ 6000 കടന്നത്. വിവിഎസ് ലക്ഷ്മണ്‍, സൗരവ് ഗാംഗുലി, ദിലീപ് വെങ്‌സര്‍ക്കാര്‍, മുഹമ്മദ് അസ്ഹറുദ്ദീന്‍, ഗുണ്ടപ്പ വിശ്വനാഥ് എന്നിവരാണ് 6000 ക്ലബിലെ മറ്റ് ഇന്ത്യന്‍ താരങ്ങള്‍.
ഇന്ത്യക്കായി 80 ടെസ്റ്റുകള്‍ കളിച്ചിട്ടുള്ള പൂജാര 18 സെഞ്ച്വറികളും 27 അര്‍ധ സെഞ്ച്വറികളും സ്വന്തമാക്കിയിട്ടുണ്ട്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
