ഗ്രെനഡ: വെസ്റ്റ് ഇന്‍ഡീസ് ക്രിക്കറ്റ് താരത്തിനെതിരായ ലൈംഗിക പീഡന ആരോപണങ്ങളില്‍ നീതി നടപ്പാക്കണമെന്ന് ടീമിന്റെ മുഖ്യപരിശീലകന്‍ ഡാരന്‍ സമി. നിലവില്‍ വിന്‍ഡീസ് ദേശീയ ടീമിന്റെ ഭാഗമായ ഗയാനയില്‍ നിന്നുള്ള താരത്തിനെതിരെയാണ് വിവിധതരത്തിലുള്ള ലൈംഗികാതിക്രമങ്ങള്‍, ലൈംഗിക പീഡനം, ബലാല്‍സംഗം തുടങ്ങിയ ആരോപണങ്ങളുമായി 11 യുവതികള്‍ രംഗത്തെത്തിയത്.
ആരോപണങ്ങളില്‍ ആര്‍ക്കെതിരെയും കേസുകള്‍ എടുത്തിട്ടില്ലെന്ന് ഓസ്ട്രേലിയയ്ക്കെതിരായ രണ്ടാം ടെസ്റ്റിന് മുന്നോടിയായുള്ള പത്രസമ്മേളനത്തില്‍ സമി പറഞ്ഞു. മാധ്യമങ്ങളില്‍ എന്താണ് സംഭവിക്കുന്നതെന്ന് നമുക്കെല്ലാവര്‍ക്കും അറിയാം. നിയമ നടപടിക്രമങ്ങളെ ബഹുമാനിക്കുന്നതായും സാഹചര്യത്തിന്റെ ഗൗരവം മനസിലാക്കുന്നതായും സമി പറഞ്ഞു.
'ടീമംഗങ്ങളുമായി എനിക്ക് വളരെ അടുപ്പമുണ്ട്. ഞാന്‍ അവരുമായി സംസാരിച്ചു, എനിക്ക് പറയാന്‍ കഴിയുന്ന ഒരു കാര്യം, ഞങ്ങള്‍ നീതിയില്‍ വിശ്വസിക്കുന്നു. ഞങ്ങളുടേത് നീതി നടപ്പാക്കണമെന്ന് വിശ്വസിക്കുന്ന ഒരു സമൂഹമാണ്. ആരോപണങ്ങളുണ്ട്, ഉചിതമായ നടപടിക്രമങ്ങളും ശരിയായ രീതികളും പാലിക്കപ്പെടുന്നുണ്ടെന്ന് ഉറപ്പാക്കാന്‍ ഞങ്ങള്‍ക്ക് കഴിയുന്നതെല്ലാം ചെയ്യും' സമി പറഞ്ഞു.
താന്‍ ഒരു ജഡ്ജിയോ, പ്രോസിക്യൂട്ടറോ അല്ല, ആരോപണങ്ങളില്‍ നിഗമനങ്ങളില്‍ എത്തുന്നതിനുമുമ്പ് നിയമ നടപടികളെ അതിന്റെ വഴിക്ക് പോകാന്‍ അനുവദിക്കേണ്ടത് അത്യാവശ്യമാണ്. ഇത് ആരോപണങ്ങളാണ്. നീതിന്യായ വ്യവസ്ഥയെക്കുറിച്ച് ഞങ്ങള്‍ക്ക് അറിയാം, കാര്യങ്ങള്‍ കൂടുതല്‍ വ്യക്തതയാകുന്നതുവരെ കാത്തിരിക്കണം. നീതി നടപ്പാക്കപ്പെടുമെന്ന് ഉറപ്പുണ്ടെന്നും സമി പറഞ്ഞു.
Sammy calls for justice, right process amid sexual assault allegations against West Indies player .
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
