ശ്രീലങ്കൻ പര്യടനം; രണ്ട് സെലക്ടർമാരോട് ഇന്ത്യൻ ടീമിനൊപ്പം പോകാൻ ബിസിസിഐ നിർദേശം

ന്യൂഡൽഹി: ലങ്കൻ പര്യടനത്തിനുള്ള ഇന്ത്യൻ വൈറ്റ്ബോൾ സംഘത്തിനൊപ്പം രണ്ട് സെലക്ടർമാരും ശ്രീലങ്കയിലേക്ക് പറക്കും. ഇന്ത്യൻ ടീമിനൊപ്പം പോകാൻ ബിസിസിഐയാണ് സെലക്ടർമാരോട് ആവശ്യപ്പെട്ടത്. 

യാത്ര നിയന്ത്രണങ്ങളെ തുടർന്ന് ലോക ടെസ്റ്റ് ചാമ്പ്യൻഷിപ്പ് ഫൈനലിനായി ഇന്ത്യയിൽ നിന്ന് ബിസിസിഐ അധികൃതരോ സെലക്ടർമാരോ പോയിരുന്നില്ല. എന്നാൽ ലങ്കയിലേക്ക് ടി20, ഏകദിന പരമ്പരയ്ക്കായി പോവുന്ന ഇന്ത്യൻ ടീമിനൊപ്പം ചേതൻ ശർമ തലവനായ സെലക്ഷൻ പാനലിലെ അബി കുരുവിള, ദേബാസിസ് എന്നീ രണ്ട് സെലക്ടർമാരുമുണ്ടാവും.

ഇം​ഗ്ലണ്ട് പര്യടനത്തിനായി കോഹ് ലിയുടെ നേതൃത്വത്തിൽ പ്രധാന താരങ്ങൾ ലണ്ടനിലായതിനാൽ ടീമിൽ കയറാൻ അവസരം കാത്തിരിക്കുന്ന നിരവധി താരങ്ങൾക്ക് ലങ്കൻ പര്യടനത്തിൽ അവസരം ലഭിച്ചിട്ടുണ്ട്. ടി20 ലോകകപ്പിന് ഒരുങ്ങുന്നതിനാൽ ലങ്കയിലെ ഇവരുടെ പ്രകടനം നിർണായകമാണ്. സെലക്ടർമാർ ഇവരുടെ ലങ്കയിലെ പ്രകടനം വിലയിരുത്തുമെന്ന് വ്യക്തം. 

മൂന്ന് ഏകദിനലും മൂന്ന് ടി20യുമാണ് ഇന്ത്യ ശ്രീലങ്കയിൽ കളിക്കുന്നത്. ശിഖർ ധവാനാണ് രണ്ട് ഫോർമാറ്റിലും ഇന്ത്യയുടെ ക്യാപ്റ്റൻ. നിലയിൽ മുംബൈയിൽ ബയോ ബബിളിൽ കഴിയുകയാണ് ലങ്കയിലേക്ക് പുറപ്പെടേണ്ട ഇന്ത്യൻ ടീം. പരിശീലകനായി ഇന്ത്യൻ ടീമിനൊപ്പം ലങ്കയിലേക്ക് പോവുന്ന രാഹുൽ ദ്രാവിഡും ക്വാറന്റൈനിലാണ്.