'ടെസ്റ്റ് ക്രിക്കറ്റിന് രാജാവിനെ വേണം, പ്ലീസ്... കോഹ്‌ലിയോട് വിരമിക്കരുതെന്ന് പറയു'

മുംബൈ: സൂപ്പര്‍താരം വിരാട് കോഹ്‌ലി ടെസ്റ്റ് ക്രിക്കറ്റില്‍ നിന്ന് വിരമിക്കാനുള്ള ആഗ്രഹം ബിസിസിഐയെ അറിയിച്ചുവെന്ന വാര്‍ത്തയുടെ ഞെട്ടലിലാണ് ആരാധകര്‍. രോഹിത് ശര്‍മ ടെസ്റ്റ് മതിയാക്കതിനു പിന്നാലെയാണ് കോഹ്‌ലിയും വിരമിക്കാനുള്ള ആഗ്രഹം ബിസിസിഐയെ അറിയിച്ചത് എന്നാണ് റിപ്പോര്‍ട്ട്. കോഹ്‌ലിയുടെ തീരുമാനത്തിനെതിരെ ആരാധകര്‍ വലിയ തോതിലാണ് സമൂഹ മാധ്യമങ്ങളില്‍ പ്രതികരിക്കുന്നത്. സൂപ്പര്‍ താരത്തോട് തീരുമാനം പുനഃപരിശോധിക്കാന്‍ ബിസിസിഐ വൃത്തങ്ങള്‍ ആവശ്യപ്പെട്ടതായും റിപ്പോര്‍ട്ടുകളുണ്ട്.

കോഹ്‌ലി, നിങ്ങള്‍ അത്തൊരമൊരു തീരുമാനം എടുക്കരുത്. അതിനുള്ള സമയം ആയിട്ടില്ല. നിങ്ങളോട് ഞങ്ങള്‍ അപേക്ഷിക്കുന്നു പ്ലീസ് വിരമിക്കരുത്. ഒരു ആരാധകന്‍ കുറിച്ചു. ഇംഗ്ലണ്ട് പര്യടനം കൂടി കഴിഞ്ഞ ശേഷം ഇതിനെക്കുറിച്ച് ആലോചിച്ചാല്‍ പോരേ എന്നായിരുന്നു മറ്റൊരു കമന്റ്.

കപില്‍ ദേവ് വിരമിച്ചു. എന്റെ മുത്തച്ഛന്‍ ക്രിക്കറ്റ് കാണുന്നത് നിര്‍ത്തി. സച്ചിന്‍ വിരമിച്ചു. എന്റെ അച്ഛന്‍ ക്രിക്കറ്റ് കാണുന്നത് നിര്‍ത്തി. കോഹ്‌ലി ഇപ്പോള്‍ വിരമിച്ചാല്‍ ഞാനും ഇനി ക്രിക്കറ്റ് കാണില്ല. ടെസ്റ്റ് ക്രിക്കറ്റിനു അതിന്റെ രാജാവിനെ ഇനിയും ആവശ്യമുണ്ട്. ബിസിസിഐ പ്ലീസ് അദ്ദേഹത്തെ പറഞ്ഞ് മനസിലാക്കു. മറ്റൊരാള്‍ കുറിച്ചു.

'യുദ്ധമെന്നത് പാക് തീരുമാനം, ഞങ്ങളുടെ കരുത്ത് താങ്ങാൻ നിങ്ങൾക്ക് കഴിയില്ല'

'അദ്ദേഹം തന്റെ തീരുമാനത്തില്‍ ഉറച്ചുനില്‍ക്കുകയും ടെസ്റ്റ് ക്രിക്കറ്റില്‍ നിന്ന് മാറുകയാണെന്ന് ബോര്‍ഡിനെ അറിയിക്കുകയും ചെയ്തിട്ടുണ്ട്. നിര്‍ണായകമായ ഇംഗ്ലണ്ട് പര്യടനം വരാനിരിക്കുന്നതിനാല്‍ പുനഃപരിശോധന നടത്താന്‍ ബിസിസിഐ അദ്ദേഹത്തോട് ആവശ്യപ്പെട്ടു. അദ്ദേഹം ഇതുവരെ അഭ്യര്‍ത്ഥനയില്‍ നിന്ന് പിന്മാറിയിട്ടില്ല,'- ബിസിസിഐ വൃത്തങ്ങളെ ഉദ്ധരിച്ചുള്ള റിപ്പോര്‍ട്ടുകളില്‍ പറയുന്നു.

അടുത്ത മാസം ഇംഗ്ലണ്ടില്‍ നടക്കുന്ന അഞ്ച് ടെസ്റ്റ് പരമ്പരയ്ക്കുള്ള ടീമിനെ തിരഞ്ഞെടുക്കാന്‍ ഇന്ത്യയുടെ സെലക്ടര്‍മാര്‍ ഏതാനും ദിവസങ്ങള്‍ക്കുള്ളില്‍ യോഗം ചേരും. ഈ വര്‍ഷം ആദ്യം ഓസ്‌ട്രേലിയയില്‍ നടന്ന ബോര്‍ഡര്‍- ഗാവസ്‌കര്‍ ട്രോഫിയില്‍ ആദ്യ ടെസ്റ്റില്‍ സെഞ്ച്വറി നേടിയ ശേഷം കോഹ്‌ലിക്ക് ടെസ്റ്റില്‍ ഫോം കണ്ടെത്താന്‍ കഴിഞ്ഞിട്ടില്ല.

36 കാരനായ കോഹ്‌ലി ഇന്ത്യയ്ക്കായി 123 ടെസ്റ്റുകള്‍ കളിച്ചിട്ടുണ്ട്. 46.85 ശരാശരിയില്‍ 9,230 റണ്‍സ് നേടി. കഴിഞ്ഞ അഞ്ച് വര്‍ഷത്തിനിടെ അദ്ദേഹത്തിന്റെ ശരാശരി കുറഞ്ഞു. 37 മത്സരങ്ങളില്‍ നിന്ന് മൂന്ന് സെഞ്ച്വറികള്‍ ഉള്‍പ്പെടെ 1,990 റണ്‍സ് മാത്രമാണ് അദ്ദേഹത്തിന് നേടാന്‍ കഴിഞ്ഞത്.