കിങ്‌സ്റ്റന്‍: ടെസ്റ്റ് പരമ്പരയിലെ ദയനീയ തോല്‍വിക്കു പിന്നാലെ ഓസ്‌ട്രേലിയക്കെതിരായ ടി20 പരമ്പരയ്ക്കിറങ്ങിയ വെസ്റ്റ് ഇന്‍ഡീസിന് തോല്‍വി തന്നെ. ആദ്യ പോരില്‍ ഓസീസ് 3 വിക്കറ്റിനു വിജയിച്ചു. അരങ്ങേറ്റ മത്സരം അര്‍ധ സെഞ്ച്വറിയോടെ അവിസ്മരണീയമാക്കി മിച്ചല്‍ ഓവന്‍ തിളങ്ങി. ഒപ്പം കാമറോണ്‍ ഗ്രീനും അര്‍ധ സെഞ്ച്വറിയടിച്ച് ജയത്തില്‍ നിര്‍ണായകമായി.
ആദ്യം ബാറ്റ് ചെയ്ത വിന്‍ഡീസ് നിശ്ചിത ഓവറില്‍ 8 വിക്കറ്റ് നഷ്ടത്തില്‍ 189 റണ്‍സെടുത്തു. ഓസ്‌ട്രേലിയ 18.5 ഓവറില്‍ 7 വിക്കറ്റ് നഷ്ടത്തില്‍ 190 റണ്‍സെടുത്താണ് വിജയം സ്വന്തമാക്കിയത്.
അരങ്ങേറ്റ പോരാട്ടത്തില്‍ 6 സിക്‌സുകള്‍ സഹിതം 27 പന്തില്‍ 50 റണ്‍സെടുത്താണ് ഓവന്‍ തിളങ്ങിയത്. ഗ്രീന്‍ 26 പന്തില്‍ 5 സിക്‌സും 2 ഫോറും സഹിതം 51 റണ്‍സും കണ്ടെത്തി.
വിന്‍ഡീസിനായി ജേസന്‍ ഹോള്‍ഡര്‍, അല്‍സാരി ജോസഫ്, ഗുഡാകേഷ് മോട്ടി എന്നിവര്‍ രണ്ട് വീതം വിക്കറ്റെടുത്തു. അകീല്‍ ഹുസൈന്‍ ഒരു വിക്കറ്റ് സ്വന്തമാക്കി.
വിന്‍ഡീസ് നിരയില്‍ ടെസ്റ്റ് ക്യാപ്റ്റന്‍ റോസ്റ്റന്‍ ചെയ്‌സാണ് ടോപ് സ്‌കോറര്‍ താരം 32 പന്തില്‍ 9 ഫോറും 2 സിക്‌സും സഹിതം 60 റണ്‍സെടുത്തു. 39 പന്തില്‍ 55 റണ്‍സെടുത്ത് ക്യാപ്റ്റന്‍ ഷായ് ഹോപും തിളങ്ങി. ഷിമ്രോണ്‍ ഹെറ്റ്‌മെയര്‍ 19 പന്തില്‍ 3 സിക്‌സും 2 ഫോറും സഹിതം 38 റണ്‍സെടുത്തു.
19 ഓവറില്‍ വിന്‍ഡീസിന് വിലപ്പെട്ട മൂന്ന് വിക്കറ്റുകള്‍ തുടരെ നഷ്ടമായത് അവസാന ഘട്ടത്തില്‍ റണ്ണടിക്കാനുള്ള ശ്രമത്തിനു വന്‍ തിരിച്ചടിയായി. 4 വിക്കറ്റുകള്‍ വീഴ്ത്തി ഓസീസിനായി മികച്ച ബൗളിങ് പുറത്തെടുത്ത ബെന്‍ ഡ്വാര്‍ഷുയിസ് 19ാം ഓവറില്‍ മൂന്നാം പന്തില്‍ ആന്ദ്രെ റസ്സല്‍, നാലാം പന്തില്‍ ഷെര്‍ഫെയ്ന്‍ റുതര്‍ഫോര്‍ഡ്, അവസാന പന്തില്‍ ജേസന്‍ ഹോള്‍ഡര്‍ എന്നിവരെ മടക്കിയാണ് വിന്‍ഡീസിനെ വെട്ടിലാക്കിയത്. 5ന് 184 റണ്‍സെന്ന നിലയില്‍ നിന്നു വിന്‍ഡീസ് 8ന് 186ലേക്കാണ് വീണത്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
