ദുബായ്: ഐപിഎല്ലില്‍ ഡല്‍ഹി ക്യാപിറ്റല്‍സിന്റെ തുടക്കത്തിലെ പോരാട്ടങ്ങളിലെ വിജയങ്ങളില്‍ നിര്‍ണായക പങ്ക് വഹിച്ച താരമായിരുന്നു വെറ്ററന്‍ ലെഗ് സ്പിന്നര്‍ അമിത് മിശ്ര. എന്നാല്‍ കൊല്‍ക്കത്ത നൈറ്റ്‌റൈഡേഴ്‌സിനെതിരായ മത്സരത്തിനിടെ കൈവരലിന് പരിക്കേറ്റത് 37കാരനായ മിശ്രയ്ക്ക് തിരിച്ചടിയായി. താരത്തിന് ശസ്ത്രക്രിയ വേണമെന്ന് ഡോക്ടര്‍മാര്‍ നിര്‍ദ്ദേശിച്ചതോടെ വെറ്ററന്‍ താരം ടീമിനോട് ഗുഡ് ബൈ പറഞ്ഞു.
ഇപ്പോഴിതാ മിശ്രയ്ക്ക് പകരക്കാരനെ കണ്ടെത്തിയിരിക്കുകയാണ് ഡല്‍ഹി ക്യാപിറ്റല്‍സ്. കര്‍ണാടക താരമായ പ്രവീണ്‍ ഡുബെയാണ് അമിത് മിശ്രയ്ക്ക് പകരക്കാരനായി ഡല്‍ഹി ടീമിലെത്തിച്ച താരം.
27കാരനായ ഡുബെ കര്‍ണാടകയ്ക്കായി 14 ടി20 മത്സരങ്ങള്‍ കളിച്ച താരമാണ്. 16 വിക്കറ്റുകള്‍ സ്വന്തമാക്കിയ ഡുബെയുടെ എക്കോണമി 6.78 ആണെന്നും ഡല്‍ഹി ഇറക്കിയ കുറിപ്പില്‍ പറയുന്നു.
നിലവില്‍ ഐപിഎല്ലില്‍ ഒന്‍പത് മത്സരങ്ങളില്‍ നിന്ന് ഏഴ് വിജയവുമായി ഡല്‍ഹി 14 പോയിന്റോടെ ഒന്നാം സ്ഥാനത്താണ്. പ്ലേയോഫിന് തൊട്ടരികിലാണ് ടീം നില്‍ക്കുന്നത്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
