ഷാര്‍ജ: കാത്തിരിപ്പിനൊടുവില്‍ യൂനിവേഴ്‌സ് ബോസ് ക്രിസ് ഗെയ്ല്‍ ഐപിഎല്ലില്‍ മടങ്ങിയെത്തിയത് ഉജ്ജ്വല വെടിക്കെട്ടോടെ തന്നെയായിരുന്നു. ആരാധകര്‍ അതിന്റെ ആവേശത്തിലാണ്. ഇപ്പോഴിതാ ഗെയ്‌ലിന്റെ സാന്നിധ്യം ടീമിന് തരുന്ന ഊര്‍ജ്ജത്തെക്കുറിച്ച് വാചാലനായി രംഗത്തെത്തിയിരിക്കുകയാണ് വിന്‍ഡീസ് താരവും കിങ്‌സ് ഇലവന്‍ പഞ്ചാബിന്റെ ബാറ്റിങ് കരുത്തുമായ നിക്കോളാസ് പൂരന്‍.
റോയല്‍ ചലഞ്ചേഴ്‌സ് ബാംഗ്ലൂരിനെതിരെ നിര്‍ണായക വിജയം പഞ്ചാബിന് സമ്മാനിക്കുന്നതില്‍ ഗെയ്‌ലിന്റെ ഹാഫ് സെഞ്ച്വറി സഹായകമായിരുന്നു. അഞ്ച് കൂറ്റന്‍ സിക്‌സുകള്‍ തൊങ്ങല്‍ ചാര്‍ത്തിയായിരുന്നു ഗെയ്‌ലിന്റെ ഇന്നിങ്‌സ്.
ഗെയ്‌ലിന്റെ മടങ്ങി വരവ് ടീമിന് വലിയ ആത്മവിശ്വാസമാണ് നല്‍കിയതെന്ന് പൂരന്‍ പറയുന്നു. ടീം ക്യാമ്പിലെ അദ്ദേഹത്തിന്റെ സാന്നിധ്യം വ്യത്യസ്തമായ ഒരു വൈകാരികത സൃഷ്ടിക്കാറുണ്ടെന്നും പൂരന്‍ പറയുന്നു. ആര്‍സിബിക്കെതിരായ പോരാട്ടത്തിന് ശേഷം ഐപിഎല്‍ ടി20 കോമിനായി സഹതാരം മായങ്ക് അഗര്‍വാളുമായി നടത്തിയ സൗഹൃദ സംഭാഷണത്തിലാണ് വെറ്ററന്‍ വിന്‍ഡീസ് താരത്തെക്കുറിച്ച് പൂരന്‍ വാചാലനായത്.
'ടി20 ഫോര്‍മാറ്റിലെ ഏറ്റവും ഉജ്ജ്വലനായ താരം താന്‍ തന്നെയാണെന്ന് അദ്ദേഹം അടിവരയിട്ടു. അദ്ദേഹം ബാറ്റ് ചെയ്യുന്നത് കാണുക എന്നത് മനോഹരമായ അനുഭവമാണ്. ആര്‍സിബിക്കെതിരെ പതുക്കെയാണ് അദ്ദേഹം തുടങ്ങിയത്. അത് അങ്ങനെത്തന്നെ ആകുമെന്ന് ഉറപ്പായിരുന്നു. കാരണം ഒരു ഇടവേളയ്ക്ക് ശേഷമാണല്ലോ അദ്ദേഹം ബാറ്റിങിന് ഇറങ്ങിയത്'- പൂരന്‍ പറഞ്ഞു.
'ടി20യിലെ ഇതിഹാസ ബാറ്റ്‌സ്മാനാണ് അദ്ദേഹം എന്നാണ് എന്റെ വ്യക്തിപരമായ അഭിപ്രായം. അദ്ദേഹം ബാറ്റ് ചെയ്യാനുണ്ടെങ്കില്‍ ടീമിന് വിജയ സാധ്യത നിലനില്‍ക്കുന്നു എന്ന തോന്നല്‍ എപ്പോഴുമുണ്ടാകും. അദ്ദേഹത്തെ പോലെ കരുത്തുറ്റ ഒരു ബാറ്റ്‌സ്മാനാണ് ടീമിന് ആവശ്യം'- പൂരന്‍ കൂട്ടിച്ചേര്‍ത്തു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
