ന്യൂഡല്‍ഹി: ആപ്പിള്‍ ഡിവൈസുകള്‍ ഉപയോക്താക്കള്‍ക്ക് സുരക്ഷാ മുന്നറിയിപ്പുമായി കേന്ദ്ര സര്‍ക്കാര്‍. വിവിധ ഡിവൈസുകളില്‍ സുരക്ഷാ വീഴ്ചകള്‍ കണ്ടെത്തിയതിനെത്തുടര്‍ന്ന് സോഫ്റ്റ്വെയര്‍ ഉടന്‍ അപ്ഡേറ്റ് ചെയ്യണമെന്നാണ് നിര്‍ദേശം. ഇന്ത്യന്‍ കമ്പ്യൂട്ടര്‍ എമര്‍ജന്‍സി റെസ്പോണ്‍സ് ടീമാണ് മുന്നറിയിപ്പ് നല്‍കിയിരിക്കുന്നത്. ഐഫോണ്‍, ഐപാഡ്, മാക് കമ്പ്യൂട്ടര്‍, ആപ്പിള്‍ വാച്ച്, ആപ്പിള്‍ ടിവി തുടങ്ങി വിവിധ ഉപകരണങ്ങളില്‍ സുരക്ഷാ വീഴ്ചകള്‍ കണ്ടെത്തിയിട്ടുണ്ട്.
ആപ്പിളിന്റെ വിവിധ ഓപ്പറേറ്റിങ് സിസ്റ്റങ്ങളിലും സഫാരി ബ്രൗസറിലുമാണ് സുരക്ഷാ പിഴവുകള്‍ കണ്ടെത്തിയിരിക്കുന്നത്. വ്യക്തിഗത ഉപയോക്താക്കള്‍ക്കും സ്ഥാപനങ്ങള്‍ക്കും മുന്നറിയിപ്പ് ബാധകമാണ്. ആപ്പിള്‍ ഉപകരണങ്ങളിലെ സുരക്ഷാ വീഴ്ചകള്‍ മുതലെടുത്ത് ഹാക്കര്‍മാര്‍ക്ക് ഉപകരണങ്ങളില്‍ ഹാനികരമായ കോഡുകള്‍ പ്രവര്‍ത്തിപ്പിക്കാനും കൂടുതല്‍ നിയന്ത്രണാധികാരം നേടാനും സാധിച്ചേക്കാം. വ്യക്തിഗത വിവരങ്ങള്‍ ചോര്‍ത്തുക, സുരക്ഷാ നിയന്ത്രണങ്ങള്‍ മറികടക്കുക, ഉപകരണങ്ങളുടെ പ്രവര്‍ത്തനം തടസ്സപ്പെടുത്തുക തുടങ്ങിയ അപകടസാധ്യതകളുമുണ്ട്.
പ്രത്യേകം തയ്യാറാക്കിയ വെബ് പേജുകള്‍, ഫയലുകള്‍, ചിത്രങ്ങള്‍, ഓഡിയോ, വിഡിയോ എന്നിവ തുറക്കുന്നതിലൂടെയോ സുരക്ഷാ പിഴവുകളുള്ള ആപ്പുകളും സിസ്റ്റം ഘടകങ്ങളും ലക്ഷ്യമിട്ടോ ആക്രമണങ്ങള്‍ നടത്താന്‍ സാധ്യതയുണ്ടെന്നാണ് മുന്നറിയിപ്പ്. മെമ്മറി കൈകാര്യം ചെയ്യുന്നതിലെ പിഴവുകള്‍, ബഫര്‍ ഓവര്‍ഫ്‌ലോ, അനുവദിച്ച പരിധിക്കു പുറത്തുള്ള വിവരങ്ങള്‍ വായിക്കുകയോ എഴുതുകയോ ചെയ്യുന്നതുമായി ബന്ധപ്പെട്ട പ്രശ്‌നങ്ങള്‍ എന്നിവയും കണ്ടെത്തിയിട്ടുണ്ട്.
ഐഫോണ്‍, ഐപാഡ്, മാക്, ആപ്പിള്‍ വാച്ച്, ആപ്പിള്‍ ടിവി, ആപ്പിള്‍ വിഷന്‍ പ്രോ എന്നിവയിലെ പഴയ സോഫ്റ്റ്വെയര്‍ പതിപ്പുകളെയാണ് സുരക്ഷാ മുന്നറിയിപ്പ് പ്രധാനമായും ബാധിക്കുന്നത്. സഫാരി ബ്രൗസറിന്റെ ചില പതിപ്പുകളും ഇതില്‍ ഉള്‍പ്പെടുന്നു.
ഐഫോണ്‍: ഐഒഎസ് 18.7.11, ഐഒഎസ് 26.7.2, ഐഒഎസ് 27.2 എന്നിവയ്ക്ക് മുമ്പുള്ള പതിപ്പുകള്‍. ഐഫോണ്‍ എക്‌സ്എസ്, എക്‌സ്എസ് മാക്‌സ്, എക്‌സ്ആര്‍ തുടങ്ങിയ മോഡലുകളും അനുയോജ്യമായ ഐഒഎസ് പതിപ്പുകള്‍ ഉപയോഗിക്കുന്ന ഐഫോണ്‍ 11 മുതലുള്ള മോഡലുകളും ഇതില്‍ ഉള്‍പ്പെടാം.
ഐപാഡ്: ഐപാഡ്ഒഎസ് 18.7.11, 26.7.2, 27.2 എന്നിവയ്ക്ക് മുമ്പുള്ള പതിപ്പുകള്‍ ഉപയോഗിക്കുന്ന പിന്തുണയുള്ള ഉപകരണങ്ങള്‍. ഏഴാം തലമുറ ഐപാഡും അതിനുശേഷമുള്ള ചില മോഡലുകളും ഇതില്‍ ഉള്‍പ്പെടാം.
മാക് കമ്പ്യൂട്ടറുകള്‍: മാക്ഒഎസ് സീക്വോയ 15.8.2, മാക്ഒഎസ് ടഹോ 26.7.2, മാക്ഒഎസ് ഗോള്‍ഡന്‍ ഗേറ്റ് 27.2 എന്നിവയ്ക്ക് മുമ്പുള്ള പതിപ്പുകള്‍.
ആപ്പിള്‍ വാച്ച്: വാച്ച്ഒഎസ് 27.2-ന് മുമ്പുള്ള പതിപ്പുകള്‍ ഉപയോഗിക്കുന്ന പിന്തുണയുള്ള മോഡലുകള്‍. ആപ്പിള്‍ വാച്ച് സീരീസ് 9 മുതലുള്ള ചില മോഡലുകള്‍ ഇതില്‍ ഉള്‍പ്പെടാം.
ആപ്പിള്‍ ടിവി: ടിവിഒഎസ് 27.2-ന് മുമ്പുള്ള പതിപ്പുകള്‍ ഉപയോഗിക്കുന്ന ആപ്പിള്‍ ടിവി 4കെ രണ്ടാം തലമുറയും അതിനുശേഷമുള്ള പിന്തുണയുള്ള മോഡലുകളും.
ആപ്പിള്‍ വിഷന്‍ പ്രോ: വിഷന്‍ഒഎസ് 27.2-ന് മുമ്പുള്ള പതിപ്പുകള്‍.
സഫാരി ബ്രൗസര്‍: അനുയോജ്യമായ മാക് കമ്പ്യൂട്ടറുകളില്‍ പ്രവര്‍ത്തിക്കുന്ന 27.2-ന് മുമ്പുള്ള പതിപ്പുകള്‍.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates
