ന്യൂഡല്‍ഹി: ജര്‍മന്‍ ആഡംബ വാഹന നിര്‍മ്മാതാക്കളായ മെഴ്സിഡസ്-ബെന്‍സ് ഇന്ത്യ പുതിയ ജി450ഡി പുറത്തിറക്കി. ഡീസല്‍ ജി-ക്ലാസ് ശ്രേണി വിപുലീകരിച്ചാണ് പുതിയ വാഹനം ഇന്ത്യന്‍ വിപണിയില്‍ അവതരിപ്പിച്ചത്. 2.90 കോടി രൂപയാണ് എക്സ്-ഷോറൂം വില.

ബ്രാന്‍ഡിന്റെ ഓഫ്-റോഡ് പാരമ്പര്യവും ആഡംബരപൂര്‍ണ്ണമായ ഇന്റീരിയറുകളും ചേര്‍ന്നതാണ് പുതിയ വാഹനം. 48-വോള്‍ട്ട് മൈല്‍ഡ്-ഹൈബ്രിഡ് സിസ്റ്റവുമായി ഇണക്കിചേര്‍ത്ത 3.0-ലിറ്റര്‍, ഇന്‍ലൈന്‍-സിക്‌സ് ഡീസല്‍ എന്‍ജിനാണ് ഇതിന്റെ കരുത്ത്. ഇന്റഗ്രേറ്റഡ് സ്റ്റാര്‍ട്ടര്‍ ജനറേറ്ററില്‍ നിന്ന് 20-ബിഎച്ച്പി അധികം ബൂസ്റ്റോടെ 362ബിഎച്ച്പി കരുത്തും 750 എന്‍എം ടോര്‍ക്കും ഇത് പുറപ്പെടുവിക്കുന്നു. ഒമ്പത് ഗിയറുള്ള വാഹനത്തിന് 5.8 സെക്കന്‍ഡിനുള്ളില്‍ 100 കിലോമീറ്റര്‍ വേഗം കൈവരിക്കാന്‍ സാധിക്കും.

മൂന്ന് വ്യത്യസ്ത ലോക്കുകള്‍, ലാഡര്‍-ഫ്രെയിം നിര്‍മ്മാണം, അഡാപ്റ്റീവ് ഡാംപിങ്, 241mm ഗ്രൗണ്ട് ക്ലിയറന്‍സ്, 70cm ഫോര്‍ഡിങ് ഡെപ്ത്, അനുയോജ്യമായ പ്രതലങ്ങളില്‍ 100 ശതമാനം വരെ ഗ്രേഡബിലിറ്റി തുടങ്ങിയവയാണ് വാഹനത്തിന്റെ പ്രധാന ഫീച്ചറുകള്‍. പുതിയ ഡിസൈനിലുള്ള ബമ്പറുകള്‍, പുതിയ എ-പില്ലര്‍ ക്ലാഡിങ്, ഒരു റൂഫ്-എഡ്ജ് സ്പോയിലര്‍ എന്നിവയുള്ള പുതുക്കിയ ഗ്രില്ലാണ് വാഹനത്തിനുള്ളത്. കൂടുതല്‍ തിളക്കമുള്ള കറുപ്പ് നിറത്തോടുകൂടിയ 20 ഇഞ്ച് AMG അലോയ് വീലുകളിലാണ് മോഡല്‍ സഞ്ചരിക്കുന്നത്.

പുനര്‍രൂപകല്‍പ്പന ചെയ്ത ഓഫ്-റോഡ് കോക്ക്പിറ്റ്, ഓഗ്മെന്റഡ് റിയാലിറ്റി നാവിഗേഷനോടുകൂടിയ പുതിയ MBUX NTG7 ഇന്‍ഫോടെയ്ന്‍മെന്റ് സിസ്റ്റം, 12.3 ഇഞ്ച് ഡ്യുവല്‍ സ്‌ക്രീന്‍ സജ്ജീകരണം എന്നിവയും മറ്റു പ്രത്യേകതകളാണ്. ഡോള്‍ബി അറ്റ്മോസും ആംബിയന്റ് ലൈറ്റിങ്ങും ഉള്ള ഒരു ബര്‍മെസ്റ്റര്‍ സൗണ്ട് സിസ്റ്റമാണ് മറ്റൊരു പ്രത്യേകത.