മുംബൈ: പ്രമുഖ ബ്രിട്ടീഷ് പ്രീമിയം ബൈക്ക് നിര്‍മ്മാതാക്കളായ ട്രയംഫിന്റെ പുതിയ 350 സിസി ബൈക്കുകള്‍ ഏപ്രില്‍ ആറിന് ഇന്ത്യന്‍ വിപണിയില്‍ അവതരിപ്പിക്കും. പുതിയ 350 സിസി ശ്രേണിയില്‍ അപ്ഡേറ്റ് ചെയ്ത സ്പീഡ്, സ്‌ക്രാംബ്ലര്‍, ത്രക്സ്റ്റണ്‍ മോഡലുകള്‍ ഉള്‍പ്പെടും.

പുതിയ 350 ശ്രേണിയില്‍ 398 സിസി മോട്ടോറിന്റെ കുറഞ്ഞ പതിപ്പായിരിക്കും ഉപയോഗിക്കുക. എന്നാല്‍ സ്‌ട്രോക്കില്‍ മാറ്റം ഉണ്ടാവില്ല. എന്നാല്‍ എന്‍ജിന്‍ സിലിണ്ടറിന്റെ വ്യാസമായ ബോറില്‍ കുറവ് വരുത്തിയാണ് 349 സിസിയില്‍ എത്തിച്ചിരിക്കുന്നത്. ടോര്‍ക്ക് ഡെലിവറി മെച്ചപ്പെടുത്താനുള്ള സാങ്കേതികവിദ്യ ഉപയോഗിച്ചിട്ടുണ്ട്.

പവര്‍ കണക്കുകള്‍ ഇതുവരെ ഔദ്യോഗികമായി പുറത്തുവിട്ടിട്ടില്ലെങ്കിലും 349 സിസി എന്‍ജിന് 35 ബിഎച്ച്പി വരെ പവര്‍ പുറപ്പെടുവിക്കാന്‍ കഴിയുമെന്നാണ് റിപ്പോര്‍ട്ടുകള്‍ വ്യക്തമാക്കുന്നത്. ഏകദേശം 32-33 എന്‍എം പീക്ക് ടോര്‍ക്കും ഉല്‍പ്പാദിപ്പിക്കാന്‍ കഴിയുന്നതായിരിക്കും എന്‍ജിന്‍.

400 ശ്രേണിയില്‍ നിന്നുള്ള സ്‌റ്റൈലും ഹാര്‍ഡ്വെയറും പുതിയ ട്രയംഫ് 350 സിസി ബൈക്കുകള്‍ കടമെടുത്തേക്കും. നിലവിലുള്ള ശ്രേണിയില്‍ TFT ഡാഷ്, റൈഡ് മോഡുകള്‍, ക്വിക്ക്-ഷിഫ്റ്റര്‍ തുടങ്ങിയ സവിശേഷതകള്‍ ഇല്ല. എന്നാല്‍ പുതിയ ശ്രേണിയില്‍ ഈ ഫീച്ചറുകള്‍ കമ്പനി പ്രയോജനപ്പെടുത്താന്‍ സാധ്യതയുണ്ട്. 18 ശതമാനം ജിഎസ്ടിയില്‍ വരുന്നത് പുതിയ 350 ശ്രേണിക്ക് ഗുണം ചെയ്യും. ഇത് വില കുറയാന്‍ സഹായകമാകും. വിലയില്‍ 15,000 മുതല്‍ 20,000 രൂപ വരെ കുറവ് വരാന്‍ സാധ്യതയുണ്ട്.