2860 കോടി ഡോളര്‍ ബ്രാന്‍ഡ് മൂല്യമുള്ള ടാറ്റ ഗ്രൂപ്പ് ആണ് ഇന്ത്യയിലെ ഏറ്റവും മൂല്യവത്തായ ബ്രാന്‍ഡ്. ഇന്‍ഫോസിസും എച്ച്ഡിഎഫ്സി ഗ്രൂപ്പുമാണ് രണ്ടും മൂന്നും സ്ഥാനങ്ങളില്‍. ബ്രാന്‍ഡ് മൂല്യനിര്‍ണ്ണയ കണ്‍സള്‍ട്ടന്‍സി സ്ഥാപനമായ ബ്രാന്‍ഡ് ഫിനാന്‍സ് ആണ് പുതിയ പട്ടിക പുറത്തുവിട്ടത്.

രാജ്യത്ത് ഏറ്റവും കൂടുതല്‍ വിപണി മൂല്യമുള്ള ബ്രാന്‍ഡുകളുടെ പട്ടികയില്‍ മുന്നില്‍ ടാറ്റ ഗ്രൂപ്പ് ആണ്. 2860 കോടി ഡോളര്‍ ( ഏകദേശം 2.38 ലക്ഷം കോടി രൂപ) ആണ് ബ്രാൻഡ് മൂല്യം.

രണ്ടാം സ്ഥാനത്ത് ഐടി കമ്പനിയായ ഇന്‍ഫോസിസ് ആണ്. 9 ശതമാനം വളര്‍ച്ചയോടെ ബ്രാന്‍ഡ് മൂല്യം 1420 കോടി ഡോളറായി ( ഏകദേശം 1.18 ലക്ഷം കോടി രൂപ) ഉയര്‍ന്നു.

എച്ച്ഡിഎഫ്‌സി ലിമിറ്റഡുമായുള്ള ലയനത്തെ തുടര്‍ന്ന് എച്ച്ഡിഎഫ്‌സി ഗ്രൂപ്പ് ആണ് മൂന്നാം സ്ഥാനത്ത്. 1004 കോടി ഡോളറാണ് ( ഏകദേശം 88,400 കോടി രൂപ) ബ്രാന്‍ഡ് മൂല്യം.

നാലാം സ്ഥാനത്ത് എല്‍ഐസി ഗ്രൂപ്പ് ആണ്. 1000 കോടി ഡോളറാണ് ബ്രാന്‍ഡ് മൂല്യം.

റിലയന്‍സ് ഗ്രൂപ്പ് ആണ് ബ്രാന്‍ഡ് മൂല്യത്തില്‍ അഞ്ചാം സ്ഥാനത്ത്. 837 കോടി ഡോളറാണ് മൂല്യം.

എസ്ബിഐ ഗ്രൂപ്പ് ആണ് ബ്രാന്‍ഡ് മൂല്യത്തില്‍ ആറാം സ്ഥാനത്ത്. എയര്‍ടെല്‍, എച്ച്‌സിഎല്‍ ടെക്, എല്‍ ആന്റ് ടി, മഹീന്ദ്ര ഗ്രൂപ്പ് എന്നിവയാണ് ആദ്യ പത്തിലെ മറ്റു ബ്രാന്‍ഡുകള്‍.