ന്യൂഡല്ഹി: രാജ്യത്ത് മൊബൈല് കണക്ഷനുകളുടെ എണ്ണത്തില് പ്രമുഖ ടെലികോം കമ്പനികളായ റിലയന്സ് ജിയോയും എയര്ടെലും തമ്മില് ഇഞ്ചോടിഞ്ച് പോരാട്ടം. ഓഗസ്റ്റിലെ ട്രായ് കണക്കില് വെറും 1.3 ശതമാനത്തിന്റെ വ്യത്യാസം മാത്രമാണ് റിലയന്സ് ജിയോയും എയര്ടെലും തമ്മില് വിപണിവിഹിതത്തില് ഉള്ളത്. വിപണിയുടെ 39.31 ശതമാനം ജിയോയും 38.01 ശതമാനം എയര്ടെലുമാണ് കൈയാളുന്നത്.
ഓഗസ്റ്റില് 24 ലക്ഷം പുതിയ മൊബൈല് കണക്ഷനുകളാണ് ജിയോ നേടിയത്. ഇക്കാലയളവില് എയര്ടെല് 21 ലക്ഷം കണക്ഷനുകള് നേടി. നിലവില് ജിയോയ്ക്ക് മൊത്തം 50.84 കോടി കണക്ഷനുകളാണ് ഉള്ളത്. 49.16 കോടി കണക്ഷനുകളുമായി ടെലികോം രംഗത്ത് എയര്ടെല് രണ്ടാം സ്ഥാനത്ത് നില്ക്കുന്നു. ടെലികോം രംഗത്ത് സ്വകാര്യ കമ്പനികള് തന്നെയാണ് മുന്പന്തിയില് നില്ക്കുന്നത്. മൊബൈല് കണക്ഷനുകളുടെ എണ്ണത്തില് സ്വകാര്യ കമ്പനികളുടെ മൊത്തം വിപണി വിഹിതം 92.75 ശതമാനമാണ്. ബിഎസ്എന്എല്, എംടിഎന്എല് എന്നി രണ്ടു പൊതുമേഖല സ്ഥാപനങ്ങള്ക്ക് ഒന്നടങ്കം 7.25 ശതമാനം വിപണി വിഹിതം മാത്രമാണ് ഉള്ളത്. മറ്റൊരു സ്വകാര്യ കമ്പനിയായ വോഡഫോണ് ഇന്ത്യയുടെ വിഹിതം 15.43 ശതമാനം മാത്രമാണ്.
കൂടുതല് ആക്ടീവ് മൊബൈല് വരിക്കാര് ഉള്ളത് എയര്ടെലിനാണ്. കേരളത്തില് മൊബൈല് കണക്ഷനുകളുടെ എണ്ണത്തില് ഇപ്പോഴും വോഡഫോണ്-ഐഡിയ തന്നെയാണ് മുന്നില്. 1.28 കോടി വരിക്കാരാണുള്ളത്. രണ്ടാമത് ജിയോയും (1.12 കോടി), മൂന്നാമത് എയര്ടെലുമാണ് (99,08,479). നാലാമതുള്ള ബിഎസ്എന്എല്ലിന് 90,56,965 വരിക്കാരാണുള്ളത്.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates