ന്യൂഡല്‍ഹി: എല്ലാ മാസങ്ങളിലേതുപോലെ നവംബറിലും സാമ്പത്തിക രംഗത്ത് നിരവധി മാറ്റങ്ങളാണ് വന്നത്. ഉപഭോക്താക്കള്‍ക്കും പെന്‍ഷന്‍കാര്‍ക്കും നവംബര്‍ മാസം നിര്‍ണായകമാണ്.
നവംബര്‍ ഒന്നുമുതലുള്ള മാറ്റങ്ങള്‍ ചുവടെ:
പാചകവാതക വില കൂട്ടി
പൊതുമേഖലാ എണ്ണ വിതരണകമ്പനികള്‍ വാണിജ്യ സിലിണ്ടറിന് വീണ്ടും വില കൂട്ടി. സിലിണ്ടറിന് പന്ത്രണ്ട് രൂപ അന്‍പത് പൈസയാണ് വര്‍ധിപ്പിച്ചത്. കൊച്ചിയില്‍ സിലിണ്ടര്‍ വില 2840 രൂപയാണ്. കോഴിക്കോട് 2870 രൂപയും തിരുവന്തപുരത്ത് 2860 രൂപയുമാണ് വില. കഴിഞ്ഞ മാസവും 65 രൂപ വര്‍ധിപ്പിച്ചിരുന്നു.
രാജ്യാന്തര ക്രൂഡോയില്‍ വില പരിഗണിച്ച് ഓരോ മാസവും ഒന്നാംതീയതിയാണ് എണ്ണക്കമ്പനികള്‍ എല്‍പിജി വില പരിഷ്‌കരിക്കുന്നത്. വാണിജ്യ സിലിണ്ടര്‍ വില വര്‍ധന ഹോട്ടല്‍, റെസ്റ്റോറന്റ്, തട്ടുകട എന്നിവ നടത്തുന്നവര്‍ക്ക് തിരിച്ചടിയാണ്. അതേസമയം, വീട്ടാവശ്യത്തിനുള്ള സിലിണ്ടറിന്റെ വില മാറ്റിയിട്ടില്ല.
കോളിങ് നെയിം പ്രസന്റേഷന്‍
ഇന്ന് മുതല്‍ അജ്ഞാത നമ്പറുകളില്‍ നിന്ന് കോളുകള്‍ വരില്ല. സേവ് ചെയ്യാത്ത നമ്പറാണെങ്കിലും വിളിക്കുന്നയാളുടെ പേര് ഇന്നുമുതല്‍ മൊബൈല്‍ ഫോണില്‍ ദൃശ്യമാകും. സിം എടുക്കാനുപയോഗിച്ച തിരിച്ചറിയല്‍ രേഖയിലെ പേര് ഫോണില്‍ തെളിയുന്ന കോളിങ് നെയിം പ്രസന്റേഷന്‍ (സിനാപ്) രാജ്യമാകെ ഇന്നു മുതല്‍ നടപ്പാക്കാനാണു കേന്ദ്രനിര്‍ദേശം.
ഇതുവരെ ഫോണില്‍ സേവ് ചെയ്ത പേരാണ് സ്‌ക്രീനില്‍ തെളിഞ്ഞു വന്നുകൊണ്ടിരുന്നത്. അല്ലെങ്കില്‍ ട്രൂകോളര്‍ പോലെ തേര്‍ഡ് പാര്‍ട്ടി ആപ്പുകളില്‍ നല്‍കുന്ന വിവരങ്ങള്‍ ആയിരിക്കും. ഇതിന് 100 ശതമാനം ആധികാരികതയില്ല. 'കോളിങ് നെയിം പ്രസന്റേഷന്‍' വരുന്നതോടെ ആരുടെ പേരിലാണ് നമ്പറെടുത്തതെന്ന് കൃത്യമായി മനസിലാക്കാം. തുടക്കത്തില്‍ 4ജി, 5ജി ശൃംഖലകളില്‍ മാത്രമാകുമിത്.
പെന്‍ഷന്‍കാര്‍ക്ക് ലൈഫ് സര്‍ട്ടിഫിക്കറ്റുകള്‍
യാതൊരുവിധ തടസ്സവുമില്ലാതെ പെന്‍ഷന്‍ ലഭിക്കുന്നതിന് സര്‍ക്കാര്‍ പെന്‍ഷന്‍കാര്‍ ഓരോ വര്‍ഷവും ലൈഫ് സര്‍ട്ടിഫിക്കറ്റ് സമര്‍പ്പിക്കേണ്ടതുണ്ട്. 80 വയസില്‍ താഴെയുള്ള പെന്‍ഷന്‍കാര്‍ക്ക് നവംബര്‍ ഒന്നുമുതല്‍ ലൈഫ് സര്‍ട്ടിഫിക്കറ്റ് സമര്‍പ്പിക്കാം. 80 വയസും അതില്‍ കൂടുതലുമുള്ളവര്‍ക്ക് ഒക്ടോബര്‍ ഒന്നുമുതല്‍ തന്നെ സമര്‍പ്പിക്കാന്‍ അനുവാദമുണ്ട്. സാധാരണയായി ഓരോ വര്‍ഷവും നവംബര്‍ 30 ആണ് സര്‍ട്ടിഫിക്കറ്റ് സമര്‍പ്പിക്കേണ്ട അവസാന തീയതി.
ചരക്കുസേവന നികുതി
നവംബര്‍ ഒന്നുമുതല്‍ വില്‍പ്പനാനന്തര കിഴിവുകള്‍ക്കുള്ള ചരക്കുസേവന നികുതിയുമായി ബന്ധപ്പെട്ട ചട്ടങ്ങള്‍ ലഘൂകരിക്കാനും ഇന്‍വേര്‍ട്ടഡ് ഡ്യൂട്ടി ഘടന നേരിടുന്ന ബിസിനസുകള്‍ക്കുള്ള താല്‍ക്കാലിക റീഫണ്ടുകള്‍ വേഗത്തിലാക്കാനും കേന്ദ്രസര്‍ക്കാര്‍ പദ്ധതിയിടുന്നുണ്ട്. കഴിഞ്ഞ ബജറ്റിലാണ് ഈ നടപടികള്‍ കേന്ദ്രസര്‍ക്കാര്‍ പ്രഖ്യാപിച്ചത്.
റിട്ടേണ്‍ സമര്‍പ്പിക്കാനുള്ള സമയപരിധി നീട്ടി
അക്കൗണ്ടുകള്‍ ഓഡിറ്റിന് വിധേയമാക്കേണ്ട നികുതിദായകര്‍ക്ക് ആദായനികുതി റിട്ടേണ്‍ സമര്‍പ്പിക്കുന്നതിനുള്ള സമയപരിധി നീട്ടിയിട്ടുണ്ട്. 2026-27 അസസ്മെന്റ് വര്‍ഷത്തേയ്ക്കുള്ള ആദായനികുതി റിട്ടേണ്‍ സമര്‍പ്പിക്കുന്നതിനുള്ള സമയപരിധി ഒക്ടോബര്‍ 31ല്‍ നിന്ന് നവംബര്‍ 21 വരെയാണ് നീട്ടിയത്. ഈ ഇളവ് എല്ലാ വ്യക്തികള്‍ക്കും ബാധകമല്ല. നിശ്ചിത വിഭാഗത്തില്‍പ്പെട്ട നികുതിദായകര്‍ക്ക് മാത്രമാണ് ഇത് ബാധകമാകുക.
ഭിന്നശേഷിക്കാര്‍ക്കുള്ള പെന്‍ഷന്‍
ഭിന്നശേഷി പെന്‍ഷന്‍ ആനുകൂല്യങ്ങള്‍ വിപുലീകരിക്കുന്നതിനായി കേന്ദ്ര മന്ത്രിസഭ അടുത്തിടെ ചില മാറ്റങ്ങള്‍ക്ക് അംഗീകാരം നല്‍കിയിരുന്നു. ഇതില്‍ ഭിന്നശേഷിയുടെ കുറഞ്ഞ പരിധി 80 ശതമാനത്തില്‍ നിന്ന് 40 ശതമാനമായി കുറയ്ക്കുന്നതും അര്‍ഹതയ്ക്കായി നിശ്ചയിച്ചിരുന്ന കുറഞ്ഞ പ്രായപരിധി ഒഴിവാക്കുന്നതും ഉള്‍പ്പെടുന്നു. അംഗീകരിച്ച പരിഷ്‌കാര നടപടികള്‍ പ്രകാരം, 80 വയസില്‍ താഴെയുള്ള അര്‍ഹരായ ഗുണഭോക്താക്കള്‍ക്ക് പ്രതിമാസം 375 രൂപയും 80 വയസും അതിന് മുകളിലും പ്രായമുള്ളവര്‍ക്ക് പ്രതിമാസം 625 രൂപയും കേന്ദ്രസഹായമായി നല്‍കാന്‍ നിര്‍ദേശിക്കുന്നു.
Subscribe to our Newsletter to stay connected with the world around you
Follow Samakalika Malayalam channel on WhatsApp
Download the Samakalika Malayalam App to follow the latest news updates