എൽപിജി സിലിണ്ടറുകളുമായി ബന്ധപ്പെട്ട പല റൂളുകളിലും ഈ മാസം മാറ്റമുണ്ടാവുകയാണ്. ഇവ പാലിച്ചില്ലെങ്കിൽ നിലവിലുള്ള പല ഉപഭോക്താക്കളുടെയും കണക്ഷൻ നഷ്ടമാകാനും ഇടയുണ്ട്. ഒപ്പം ബുക്കിങ് കാലയളവിലെ നിയന്ത്രണം ഇനിയും തുടരും. വാണിജ്യ സിലിണ്ടറുകളുടെ വില കുറഞ്ഞതും ശ്രദ്ധേയമാണ്. പ്രധാനപ്പെട്ട അഞ്ച് കാര്യങ്ങൾ ചുവടെ:

1. കൊമേഴ്സ്യൽ സിലിണ്ടറുകളുടെ വില കുറഞ്ഞു (19 കിലോഗ്രാം)

ഹോട്ടലുകളിലും വ്യാവസായിക ആവശ്യങ്ങൾക്കും ഉപയോഗിക്കുന്ന 19 കിലോഗ്രാമിന്റെ കൊമേഴ്സ്യൽ എൽപിജി സിലിണ്ടറുകളുടെ വിലയിൽ വലിയ കുറവ് വരുത്തിയിട്ടുണ്ട്. രാജ്യത്തെ വിവിധ ന​ഗരങ്ങളിൽ 173 മുതൽ 183.50 രൂപ വരെയാണ് കുറഞ്ഞിരിക്കുന്നത്. തിരുവനന്തപുരത്ത് കൊമേഴ്സ്യൽ എൽപിജി സിലിണ്ടറിന് ഏകദേശം 2,970 രൂപയായി വില കുറഞ്ഞു. ഇക്കൊല്ലം ഇതാദ്യമായാണ് കൊമേഴ്സ്യൽ സിലിണ്ടറുകളുടെ വില കുറയുന്നത്.

2. ഗാർഹിക സിലിണ്ടറുകളുടെ വിലയിൽ മാറ്റമില്ല (14.2 കിലോഗ്രാം)

വീടുകളിൽ സാധാരണയായി ഉപയോഗിക്കുന്ന 14.2 കിലോഗ്രാം ഗാർഹിക സിലിണ്ടറുകളുടെ വിലയിൽ ഇത്തവണ മാറ്റമൊന്നും വരുത്തിയിട്ടില്ല. ഡൽഹിയിൽ ഇത് 942 രൂപയായും മുംബൈയിൽ 941.50 രൂപയായും തുടരുന്നു.

3. ഇ-കെവൈസി (e-KYC) നിർബന്ധം

എല്ലാ എൽപിജി ഉപഭോക്താക്കളും അവരുടെ ഇ-കെവൈസി (ബയോമെട്രിക് ആധാർ വെരിഫിക്കേഷൻ) പൂർത്തിയാക്കേണ്ടത് നിർബന്ധമാണ്. വ്യാജ കണക്ഷനുകൾ ഒഴിവാക്കാനും സബ്‌സിഡി കൃത്യമായി അർഹരായവരിലേക്ക് എത്തിക്കാനും വേണ്ടിയാണിത്. കെവൈസി പൂർത്തിയാക്കാത്തവരുടെ കണക്ഷനുകൾ താൽക്കാലികമായി നിർത്തിവെക്കാനോ സബ്‌സിഡി തടയാനോ സാധ്യതയുണ്ട്.

4. പിഎൻജി (PNG) കണക്ഷൻ ഉള്ളവർക്കുള്ള പുതിയ നിയമങ്ങൾ

നിങ്ങളുടെ പ്രദേശത്ത് പൈപ്പ്ഡ് നാച്ചുറൽ ഗ്യാസ് (പിഎൻജി) സൗകര്യം ലഭ്യമാണെങ്കിൽ താഴെ പറയുന്ന നിയമങ്ങൾ ബാധകമാകും:

• പുതിയ പിഎൻജി കണക്ഷൻ എടുക്കുന്നവർ 30 ദിവസത്തിനകം തങ്ങളുടെ നിലവിലുള്ള എൽപിജി (ഇന്ധൻ, ഭാരത്, എച്ച്പി) കണക്ഷൻ റദ്ദാക്കണം.

• പിഎൻജി ലൈനുകൾ പൂർണമായി സ്ഥാപിച്ചിട്ടുണ്ടെങ്കിൽ, പൈപ്പ് ഗ്യാസിലേക്ക് മാറാൻ ഉപഭോക്താക്കൾക്ക് 90 ദിവസത്തെ സമയം ലഭിക്കും. അതിനുള്ളിൽ മാറിയില്ലെങ്കിൽ എൽപിജി സിലിണ്ടർ വിതരണം തടസ്സപ്പെടാം.

വൊളന്ററിയായി എൽപിജി കണക്ഷൻ സറണ്ടർ ചെയ്യുന്നവർക്ക് ഒരു കൂപ്പൺ ലഭിക്കും. ഇതുപയോഗിച്ച് ഭാവിയിൽ ആവശ്യമുണ്ടാകുന്ന പക്ഷം അവർക്ക് ഒരു എൽപിജി കണക്ഷൻ നേടാൻ സാധിക്കും.

5. സിലിണ്ടർ ബുക്കിങ് ഗ്യാപ് (Lock-in Period)

ഗ്യാസ് സിലിണ്ടറുകൾ വീണ്ടും ബുക്ക് ചെയ്യുന്നതിനുള്ള ഇടവേളയിൽ മാറ്റമില്ല. നിലവിൽ നഗരപ്രദേശങ്ങളിലുള്ളവർക്ക് 25 ദിവസത്തിന് ശേഷവും, ഗ്രാമപ്രദേശങ്ങളിലുള്ളവർക്ക് 45 ദിവസത്തിന് ശേഷവും മാത്രമേ അടുത്ത സിലിണ്ടർ റീഫിൽ ബുക്ക് ചെയ്യാൻ സാധിക്കൂ.