മുംബൈ: ഓഹരി വിപണിയില്‍ പത്തു മുന്‍നിര കമ്പനികളില്‍ ഏഴെണ്ണത്തിന്റെ വിപണി മൂല്യത്തില്‍ ഇടിവ്. ഒരു ദിവസത്തെ അവധി കാരണം നാലുദിവസമായി ചുരുങ്ങിയ കഴിഞ്ഞയാഴ്ചത്തെ ഓഹരി വിപണിയില്‍ ഏഴു മുന്‍നിര കമ്പനികളുടെ വിപണി മൂല്യത്തില്‍ ഒന്നടങ്കം 88,635 കോടിയുടെ നഷ്ടമാണ് രേഖപ്പെടുത്തിയത.

കഴിഞ്ഞയാഴ്ച ബിഎസ്ഇ സെന്‍സെക്‌സ് 722 പോയിന്റിന്റെ നഷ്ടമാണ് നേരിട്ടത്. നിഫ്റ്റി 229 പോയിന്റും താഴ്ന്നു. ഭാരതി എയര്‍ടെല്‍, ടിസിഎസ് എന്നി കമ്പനികളാണ് കഴിഞ്ഞയാഴ്ച ഏറ്റവുമധികം നഷ്ടം നേരിട്ടത്. ഈ രണ്ടു കമ്പനികള്‍ക്ക് പുറമേ റിലയന്‍സ്, എച്ച്ഡിഎഫ്‌സി ബാങ്ക്, ഐസിഐസിഐ ബാങ്ക്, ഇന്‍ഫോസിസ്, ഹിന്ദുസ്ഥാന്‍ യൂണിലിവര്‍ എന്നി ഓഹരികളാണ് നഷ്ടം നേരിട്ടത്. അതേസമയം എസ്ബിഐ, ബജാജ് ഫിനാന്‍സ്, എല്‍ഐസി ഓഹരികള്‍ നേട്ടം സ്വന്തമാക്കി.

ഭാരതി എയര്‍ടെലിന്റെ മാത്രം വിപണി മൂല്യത്തില്‍ 30,506 കോടിയുടെ നഷ്ടമാണ് നേരിട്ടത്. 11,41,048 കോടിയായാണ് എയര്‍ടെലിന്റെ വിപണി മൂല്യം താഴ്ന്നത്. ടിസിഎസ് 23,680 കോടി, ഹിന്ദുസ്ഥാന്‍ യൂണിലിവര്‍ 12,253 കോടി, റിലയന്‍സ് 11,164 കോടി, എച്ച്ഡിഎഫ്‌സി ബാങ്ക് 7,303 കോടി, ഇന്‍ഫോസിസ് 2,139 കോടി എന്നിങ്ങനെയാണ് മറ്റു കമ്പനികളുടെ വിപണി മൂല്യത്തില്‍ ഉണ്ടായ ഇടിവ്.

അതേസമയം എല്‍ഐസിയുടെ വിപണി മൂല്യത്തില്‍ 18,469 കോടിയുടെ വര്‍ധനയാണ് രേഖപ്പെടുത്തിയത്. എസ്ബിഐ 17,492 കോടി, ബജാജ് ഫിനാന്‍സ് 14,965 കോടി എന്നിങ്ങനെയാണ് മറ്റു കമ്പനികളുടെ വിപണി മൂല്യത്തില്‍ ഉണ്ടായ വര്‍ധന. ഇത്തവണയും വിപണി മൂല്യത്തില്‍ റിലയന്‍സ് തന്നെയാണ് മുന്നിട്ടുനില്‍ക്കുന്നത്.