മുംബൈ: ഓഹരി വിപണിയില്‍ പത്തുമുന്‍നിര കമ്പനികളില്‍ അഞ്ചെണ്ണത്തിന്റെ വിപണി മൂല്യത്തില്‍ വര്‍ധന. കഴിഞ്ഞയാഴ്ച അഞ്ചു കമ്പനികളുടെ വിപണി മൂല്യത്തില്‍ ഒന്നടങ്കം 72,284 കോടിയുടെ വര്‍ധനയാണ് രേഖപ്പെടുത്തിയത്. ടിസിഎസും ഇന്‍ഫോസിസുമാണ് ഏറ്റവുമധികം നേട്ടം സ്വന്തമാക്കിയത്.

കഴിഞ്ഞയാഴ്ച സെന്‍സെക്‌സ് 5.7 പോയിന്റിന്റെ വര്‍ധനയാണ് രേഖപ്പെടുത്തിയത്. ടിസിഎസിനും ഇന്‍ഫോസിസിനും പുറമേ ഭാരതി എയര്‍ടെല്‍, ഐസിഐസിഐ ബാങ്ക്, ബജാജ് ഫിനാന്‍സ് ഓഹരികളാണ് നേട്ടം ഉണ്ടാക്കിയത്. ടിസിഎസിന് മാത്രം വിപണി മൂല്യത്തില്‍ 35,909 കോടിയുടെ വര്‍ധനയാണ് ഉണ്ടായത്. 11,71,862 കോടിയായാണ് ടിസിഎസിന്റെ വിപണി മൂല്യം ഉയര്‍ന്നത്.

ഇന്‍ഫോസിസ് 23,404 കോടി, ബജാജ് ഫിനാന്‍സ് 6,720 കോടി, ഭാരതി എയര്‍ടെല്‍ 3,791 കോടി, ഐസിഐസിഐ ബാങ്ക് 2,458 കോടി എന്നിങ്ങനെയാണ് മറ്റു കമ്പനികളുടെ വിപണി മൂല്യത്തില്‍ ഉണ്ടായ വര്‍ധന. അതേസമയം റിലയന്‍സിന്റെ അടക്കം വിപണി മൂല്യത്തില്‍ ഇടിവ് ഉണ്ടായി. കഴിഞ്ഞയാഴ്ച റിലയന്‍സിന് വിപണി മൂല്യത്തില്‍ 35,116 കോടിയുടെ ഇടിവാണ് രേഖപ്പെടുത്തിയത്. എല്‍ഐസി 15,559 കോടി, എസ്‌ഐബി 7,522 കോടി എന്നിങ്ങനെയാണ് മറ്റു കമ്പനികളുടെ വിപണി മൂല്യത്തില്‍ ഉണ്ടായ ഇടിവ്. ഇടിവ് ഉണ്ടായിട്ടും വിപണി മൂല്യത്തില്‍ റിലയന്‍സ് തന്നെയാണ് ഒന്നാം സ്ഥാനത്ത് നില്‍ക്കുന്നത്.