പരീക്ഷാ തട്ടിപ്പിൽ പിഎസ് സിക്കെതിരെ ഹൈക്കോടതി, തെരഞ്ഞെടുപ്പ് കമ്മീഷന് സുപ്രീംകോടതി നോട്ടീസ്, മുഖ്യമന്ത്രിക്കെതിരെ ഖാർ​ഗെയ്ക്ക് പരാതി; ഇന്നത്തെ 5 പ്രധാന വാർത്തകൾ

ആസൂത്രണ ബോര്‍ഡ് പരീക്ഷാ ക്രമക്കേടില്‍ പിഎസ് സിക്കെതിരെ വിമര്‍ശനവുമായി ഹൈക്കോടതി. ഗ്യാനേഷ് കുമാറിനെതിരായ ഹര്‍ജിയില്‍ തെരഞ്ഞെടുപ്പ് കമ്മീഷന് സുപ്രീംകോടതിയുടെ നോട്ടീസ്. മുഖ്യമന്ത്രി വിഡി സതീശനെതിരെ പരാതിയുമായി അടൂര്‍ പ്രകാശ് കോണ്‍ഗ്രസ് അധ്യക്ഷന്‍ മല്ലികാര്‍ജുന്‍ ഖാര്‍ഗെയെ കണ്ടു. ഇന്നത്തെ 5 പ്രധാന വാര്‍ത്തകള്‍ ( Top 5 News Today ) അറിയാം.

ആസൂത്രണ ബോര്‍ഡിലേക്ക് നടന്ന പരീക്ഷയുടെ മൂല്യനിര്‍ണയ ക്രമക്കേടില്‍ പിഎസ്‌സിക്കെതിരെ രൂക്ഷവിമര്‍ശനവുമായി ഹൈക്കോടതി. നടന്നത് ഗുരുതരമായ അഴിമതിയാണ്. ക്രമക്കേട് നടത്തിയെങ്കില്‍ അത് അന്വേഷിക്കേണ്ടേയെന്ന് ചോദിച്ച കോടതി പിഎസ്‌സി അന്വേഷണത്തോട് സഹകരിക്കുകയാണ് വേണ്ടതെന്ന് ചൂണ്ടിക്കാട്ടി. ക്രൈംബ്രാഞ്ച് അന്വേഷണത്തിനെതിരെ ഹര്‍ജി നല്‍കാന്‍ പിഎസ്‌സിക്ക് എന്തധികാരമെന്നും കോടതി ചോദിച്ചു.

"മാറ്റം വരുത്തിയ ഫോം 6-ന് ഞങ്ങൾ യാതൊരുവിധ അനുമതിയും നൽകിയിട്ടില്ല, ഇക്കാര്യത്തിൽ വളരെ വ്യക്തതയുണ്ടാകണം" – വോട്ടർ പട്ടികയിൽ പേര് ചേർക്കുന്നതിനുള്ള ഫോം 6-ൽ വരുത്തിയ വിവാദ ഭേദഗതികളിലും സ്പെഷ്യൽ ഇന്റൻസീവ് റിവിഷൻ നടപടികളിലും നിർണ്ണായക പരാമർശവുമായി സുപ്രീം കോടതി. നിയമവിരുദ്ധമായി തീരുമാനമെടുത്താൽ റദ്ദാക്കുമെന്നും കോടതി വ്യക്തമാക്കി.

സംസ്ഥാന സര്‍ക്കാരിന്റെയും മുഖ്യമന്ത്രി വിഡി സതീശന്റെയും പ്രവര്‍ത്തനത്തില്‍ അതൃപ്തി പരസ്യമാക്കിയ യുഡിഎഫ് കണ്‍വീനര്‍ അടൂര്‍ പ്രകാശ് ഡല്‍ഹിയിലെത്തി കോണ്‍ഗ്രസ് പ്രസിഡന്റ് മല്ലികാര്‍ജുന്‍ ഖാര്‍ഗെയുമായി കൂടിക്കാഴ്ച നടത്തി. നേരിട്ട് ഖാര്‍ഗെയെ കണ്ട് പരാതികള്‍ അറിയിച്ചോയെന്ന മാധ്യമപ്രവര്‍ത്തകരുടെ ചോദ്യത്തിന്, യെസ് എന്ന് അടൂര്‍ പ്രകാശ് മറുപടി നല്‍കി.

വൈകുന്നേരങ്ങളില്‍ എറണാകുളത്തുനിന്ന് കോട്ടയം വഴി തെക്കന്‍ ജില്ലകളിലേക്ക് പോകുന്ന വേണാട് എക്‌സ്പ്രസ്സിലെ അമിത തിരക്കിന് പരിഹാരമായി പുതിയ ട്രെയിന്‍ സര്‍വീസ് ആരംഭിക്കുന്നു. എറണാകുളം-കോട്ടയം-ചെങ്ങന്നൂര്‍-കൊല്ലം റൂട്ടില്‍ പുതിയ പാസഞ്ചര്‍ ട്രെയിന്‍ സര്‍വീസിന് റെയില്‍വേ മന്ത്രാലയം തത്വത്തില്‍ അംഗീകാരം നല്‍കി. പുതിയ ട്രെയിനിന്റെ ആദ്യ സര്‍വീസ് 10 ദിവസത്തിനകം ആരംഭിക്കുമെന്ന് കൊടിക്കുന്നില്‍ സുരേഷ് എംപി അറിയിച്ചു.

ഹര്‍ദീപ് സിങ് പുരിയെ ഒഴിവാക്കി

ഉത്തര്‍പ്രദേശില്‍ നടക്കാനിരിക്കുന്ന രാജ്യസഭാ തെരഞ്ഞെടുപ്പിലേക്കുള്ള എട്ട് സ്ഥാനാര്‍ഥികളുടെ പട്ടിക ബിജെപി പ്രഖ്യാപിച്ചു. പൂര്‍ണമായും ജാതി സമവാക്യങ്ങള്‍ പാലിച്ചുകൊണ്ട് തയ്യാറാക്കിയ പട്ടികയില്‍ കേന്ദ്ര പെട്രോളിയം മന്ത്രി ഹര്‍ദീപ് സിങ് പുരി ഇടംപിടിച്ചില്ല എന്നത് ശ്രദ്ധേയമാണ്. കേന്ദ്ര മന്ത്രിസഭയില്‍ ഉടന്‍ തന്നെ പുനഃസംഘടന നടന്നേക്കുമെന്നതിന്റെ സൂചനയായാണ് ഇത് വിലയിരുത്തപ്പെടുന്നത്.